हेटौंडा, पुस ९ गते । हेटौंडा–४ स्थित भुटनदेवी माध्यमिक विद्यालय (प्राविधिक शिक्षालय) ले आफ्ना निजी स्रोतमा कार्यरत १३ जना शिक्षक तथा कर्मचारीलाई सामाजिक सुरक्षा कोषमा आबद्ध गराएको छ। विद्यालयले आफ्नै आन्तरिक स्रोतको प्रयोग गरी शिक्षक र कर्मचारीलाई सामाजिक सुरक्षा कोषमा समेटेको हो।
कोष स्थापनाका अभियन्ता तथा जिफण्ट केन्द्रीय अध्यक्ष विनोद श्रेष्ठले एक कार्यक्रमबीच सामाजिक सुरक्षा कोषका आबद्ध सदस्य कार्ड वितरण गतेको छ। सो अवसरमा उनले सामाजिक सुरक्षाले श्रमिकको भविष्य सुरक्षित बनाउने र सामुदायिक विद्यालयले देखाएको यो अभ्यास उदाहरणीय रहेको बताए।
आन्तरिक स्रोतबाट शिक्षक तथा कर्मचारीलाई सामाजिक सुरक्षा कोषमा आबद्ध गराउने देशकै पहिलो सामुदायिक विद्यालयका रूपमा भुटनदेवी माविले नयाँ पहिचान बनाएको छ। विद्यालयको यस कदमले सामुदायिक शिक्षामा कार्यरत शिक्षक र कर्मचारीको हक–अधिकार सुनिश्चित गर्न महत्वपूर्ण योगदान पुग्ने अपेक्षा गरिएको छ।
