काठमाडौं,बैशाख ७ गते । गृहमन्त्री सुधन गुरुङले आफ्नो नाम जोडेर पछिल्ला दिनमा भइरहेका विभिन्न आरोप र चर्चाप्रति स्पष्टिकरण दिएका छन्। सामाजिक सञ्जाल फेसबुक मार्फत सार्वजनिक गरिएको लामो वक्तव्यमा उनले आफूविरुद्ध फैलाइएका हल्ला र वास्तविकताबीच फरक रहेको उल्लेख गर्दै तथ्यका आधारमा मूल्याङ्कन गर्न आग्रह गरेका छन्।
“२५ लाखको सेयर लुकाइएको” भन्ने आरोपप्रति प्रतिक्रिया दिँदै मन्त्री गुरुङले आफूले धितोपत्र बजारमा कारोबार हुने सेयरहरू अन्तर्गत २ करोडभन्दा बढी लगानी सम्पत्ति विवरणमै खुलाएको बताएका छन्। उनले स्टार माइक्रो इन्स्योरेन्स र लिबर्टी माइक्रोमा गरिएको लगानी पनि सोही वर्गमा समेटिएको स्पष्ट पारे। “यो लुकाउने विषय होइन, वर्गीकरणको विषय हो,” उनले भने।
मन्त्री गुरुङले आफूले सम्पत्ति लुकाएको भन्ने आरोपलाई खण्डन गर्दै “लुकाउने व्यक्तिले खुला रूपमा २ करोडभन्दा बढी सम्पत्ति देखाउँदैन” भन्ने तर्क प्रस्तुत गरेका छन्।
“मन्त्री हुनुअघि सेयर किनियो” भन्ने विषयमा उनले सेयरमा लगानी गर्नु अपराध नभएको उल्लेख गर्दै सम्पूर्ण कारोबार बैंकिङ च्यानलमार्फत भएको बताएका छन्। “बैंकबाट गएको पैसाको सबै हिसाब हुन्छ, यस्तो हिसाब हुने पैसा लुकाउन सम्भव हुँदैन,” उनले स्पष्ट पारे।
स्रोतबारे उठेका प्रश्नमा उनले आफूले लगानी गरेको रकम ऋण (कर्जा) मार्फत जुटाइएको र त्यसको लिखित तमसुक मिति २०८०/०५/२९ रहेको जानकारी दिए। सो रकम बैंकिङ प्रणालीमार्फत आएको र त्यसैबाट लगानी गरिएको उनले बताए। “पैसा कहाँबाट आयो भन्ने कुरा अनुमानको होइन, कागज र बैंक रेकर्डले प्रमाणित गर्ने विषय हो,” उनले उल्लेख गरेका छन्।
“विवादित व्यक्तिसँग साझेदारी” भन्ने आरोपप्रति उनले एउटै कम्पनीमा सयौँ–हजारौँ सेयरहोल्डर हुने भएकाले सेयर किन्नु सबैसँग साझेदारी गर्नु नभएको बताएका छन्। “यदि त्यसैलाई आधार मान्ने हो भने सोही कम्पनीमा लगानी गर्ने सबैलाई दोषी ठहर गर्नुपर्ने हुन्छ,” उनले प्रश्न उठाए।
“Conflict of interest” सम्बन्धी आरोपबारे उनले छानबिन गर्ने निकाय गृह मन्त्रालय नभई अर्थ मन्त्रालय अन्तर्गतको सम्पत्ति शुद्धिकरण विभाग भएको स्पष्ट पार्दै उक्त निकायले प्रक्रिया अनुसार अनुसन्धान गरिरहेको जानकारी दिए। “यदि मैले हस्तक्षेप गरेको भए छानबिन प्रक्रिया नै अघि बढ्ने थिएन,” उनले भने।
पृष्ठभूमि नजाँची लगानी गरेको भन्ने आरोपलाई पनि उनले अस्वीकार गर्दै व्यापारिक लगानीमा जोखिम हुने स्वाभाविक प्रक्रिया भएको बताएका छन्। “पछि भएको घटनालाई अघि गरेको निर्णयको दोष बनाउनु तथ्य होइन,” उनले स्पष्ट पारे।
कानुनी रूपमा संवेदनशील विषय भएकाले तत्काल प्रतिक्रिया नदिनु उपयुक्त हुने पनि उनले बताएका छन्। “हल्ला छिटो फैलिन्छ, तर सत्य प्रमाणसहित मात्र आउँछ,” उनले लेखेका छन्।
अन्त्यमा उनले आरोप र सत्य फरक कुरा भएको उल्लेख गर्दै निर्णय प्रमाणका आधारमा हुनुपर्ने बताएका छन्। साथै, पार्टीले गर्ने हरेक निर्णय पालना गर्ने र अनुसन्धानमा पूर्ण सहयोग गर्ने प्रतिबद्धता जनाएका छन्।
