हेटौंडा, असार २३ गते । जिल्ला प्रशासन कार्यालय मकवानपुरले नयाँ राहदानी प्रणाली कार्यान्वयनको तयारीस्वरूप असार २४ गतेदेखि २८ गतेसम्म जिल्लाभर राहदानीसम्बन्धी सम्पूर्ण सेवा स्थगित हुने जनाएको छ।
कार्यालयले सोमबार सार्वजनिक गरेको सूचनाअनुसार राहदानी विभागले असार २९ गतेदेखि नयाँ राहदानी प्रणाली सञ्चालनमा ल्याउने तयारी गरिरहेको छ। सोही तयारीका कारण चार दिनसम्म राहदानीसम्बन्धी सबै सेवा बन्द रहने जनाइएको हो।
प्रशासकीय अधिकृत सरोजप्रसाद पौडेलद्वारा जारी सूचनामा यसअघि राहदानीका लागि आवेदन दिएका तर विभिन्न कारणले आवेदन अस्वीकृत भई पुनः आवेदन गर्नुपर्ने सेवाग्राहीलाई असार २३ गते कार्यालय समयभित्र आवश्यक प्रक्रिया पूरा गर्न अनुरोध गरिएको छ।
यस्तै, राहदानी विभागबाट छपाइ भएर जिल्ला प्रशासन कार्यालयमा प्राप्त भइसकेका राहदानीसमेत असार २३ गतेभित्र सम्बन्धित सेवाग्राहीले बुझिसक्न प्रशासनले आग्रह गरेको छ।
जिल्ला प्रशासन कार्यालयका अनुसार असार २९ गतेदेखि नयाँ राहदानी प्रणालीमार्फत आवेदन दर्ता, नवीकरण तथा अन्य राहदानी सेवा पुनः नियमित रूपमा सञ्चालन हुनेछ। सेवाग्राहीलाई आवश्यक काम समयमै सम्पन्न गरी असुविधाबाट बच्न प्रशासनले अनुरोध गरेको छ।
