मकवानपुर । आत्मनिर्भर हुनका लागि कृषि उत्पादनमा जोड दिँदै नेपाल कम्युनिस्ट पार्टी मकवानपुरले धान रोपाइँ गरेको छ । पार्टीको निर्णय अनुसार नेताकार्यकर्ता र आम जनतालाई निकट भविष्यमा आत्मनिर्भर बनाउने उद्देश्यले सुरु गरेको सामुहिक उत्पादन प्रणालीलाई अंगाल्दै नेकपा मकवानपुरले पनि सामुहिक उत्पादनलाई निरन्तरता दिइरहेको छ ।
मनहरी-५ दरदरा स्थित केन्द्रिय उत्पादन विभाग मनहरीमा नेकपा मकवानपुरले आज धान रोपेको छ । लगभग तीन बिगाहामा फैलिएको उत्पादन क्षेत्रमा पार्टीले समय अनुकुल नगदे बाली र अन्नबाली लगाउँदै आइरहेको छ । उक्त उत्पादन शाखामा पार्टीले हालसम्म काँक्रा, भ्यान्टा, आलु, खुर्सानी, प्याज, लसुन लगायतका तरकारी बाली र मकै, धान, गहुँ जस्ता अन्नबाली उत्पादन गरिसकेको छ ।
उत्पादन क्षेत्रको केही भागमा धान रोप्ने केही भागमा मकै छर्ने र केही ठाउँमा तरकारी बाली लगाउने तयारी गरिरहेको कुरा नेकपा मकवानपुरका सेक्रेटरी पेमा सीले जानकारी दिएका छन् । त्यस्तै उत्पादन, संगठन र संघर्षको कामलाई एकैसाथ अगाडि बढाउन बढो मेहनतका साथ लागि पर्ने नेकपा मकवानपुरका इन्चार्ज राम सीले कृषि उत्पादन सँगै पार्टीले व्यवसायिक कुखुरा पालनको काम पनि भैरहेको बताएका छन् ।
क नेकपाले सुरु गरेको उत्पादन क्षेत्रमा स्थानीय जनताको पनि उत्साह पूर्ण सहभागिता रहेको छ । सामुहिक उत्पादन मार्फत पार्टीले गरेको काम देखेर वरपराका किसानले पनि आफ्नो खेतबारी बाँजो नराखी निरन्तर खेती गरिरहेका छन् ।
विशेषत छिमेकी देश भारतले खाद्यान्न आपूर्तिमा नाकाबन्दी गरेता पनि आम नेपालीले खान पुग्ने खाद्य उत्पादन गरि देशलाई आत्मनिर्भर बनाउने उद्देश्यका साथ नेकपाले सामुहिक उत्पादनलाई जोड दिएको हो । पछिल्लो समयमा भैरहेको युवा पंक्तिको विदेश पलायन र गाउँघरमा खेतबारी बाँजो राख्ने अनि घर कोठामा बसि खाने विचलनकारी प्रवृत्तिको मध्यनजर गर्दै पार्टीले यो कदम चालेको बताइएका छन् ।
