काठमाडौँ। दर्शकहरूको अमूल्य मतका आधारमा, गायन रियालिटी शो द भ्वाइस अफ नेपाल सिजन ६ को विजेता आज प्रसारित कार्यक्रमबाट तय गरिएको छ। कोच खेमको टिमका प्रतिस्पर्धी प्रोसेस पाण्डेले उत्कृष्ट प्रस्तुति प्रस्तुत गर्दै यस सिजनको उपाधि चुम्न सफल भएका छन्।
उनी विजेता भएसँगै द भ्वाइस अफ नेपालको तर्फबाट रु. २० लाख, क्लोज अपको तर्फबाट रु. १ लाख र लेट मी इनको तर्फबाट रु. १ लाख गरी जम्मा रु. २२ लाख बराबरको पुरस्कार राशि प्राप्त गर्न सफल भएका छन्।
त्यस्तै, कोच मेलिनाको टिमका रोशन राई प्रथम उपविजेता, कोच राजुको टिमका प्रमेश राई द्वितीय उपविजेता र कोच उदयको टिमबाट प्रतिस्पर्धा गरेकी अर्पना आचार्य तृतीय उपविजेतामै चित्त बुझाउनु परेको छ।
तीन महिनाभन्दा लामो समयसम्म चलेको यो गायन प्रतियोगिता हिमालयन टेलिभिजन एचडी र द भ्वाइस अफ नेपालको आधिकारिक युट्युब च्यानलबाट प्रत्येक शुक्रबार र शनिबार प्रसारण हुँदै आएको थियो।
