झापा। नेपाल रेडक्रस सोसाइटी उपशाखा गौरादहले बृहत् रक्तदान कार्यक्रम सम्पन्न गरेको छ।आज विश्व रेडक्रस दिवस (मे ८) को अवसरमा सम्पन्न कार्यक्रमरक्त सञ्चार केन्द्र दमकको प्राविधिक सहयोगमा सम्पन्न भएको हो।
कार्यक्रममा ८४ जनाले रक्तदान गरेका मध्ये १७ महिला र ६७ पुरुष रहेको जनाइएको छ। रक्तदातामध्ये डिल्लीकुमार श्रेष्ठ (५६ वर्ष) सबैभन्दा वरिष्ठ र वरुन सुन्दास तथा अर्जुन पान्डे (१९ वर्ष) सबैभन्दा कान्छा रक्तदाता रहनुभएको थियो। गौरादह १ का गणेशमान सिंह अधिकारीले हालसम्म ५९ पटक रक्तदान गरी सबैभन्दा धेरै पटक रक्तदान गर्नेको रेकर्ड राख्नुभएको छ।
कार्यक्रम रेडक्रस संस्थापक जा हेनरी ड्युनाको तस्वीरमा पुष्पगुच्छा अर्पण र रक्तदातालाई ब्लड ब्याग हस्तान्तरण गर्दै उद्घाटन गरिएको कार्यक्रमको सभापतित्व उपशाखाका सभापति सन्जिव बहादुर कार्कीले गरेका थिए भने प्रमुख अतिथि झापा जिल्ला शाखाका उपसभापति मित्रदेव काफ्ले रहेका थिए।
कार्यक्रममा सहभागी सबै रक्तदाताहरूलाई प्रमाणपत्रसहित धन्यवाद दिइएको नेपाल रेडक्रस सोसाइटी गौरादह उपशाखाका सचिव प्रकाश भट्टराईले जानकारी दिए।
