मकवानपुर । अखिल (समाजवादी) मकवानपुरले आज सिडियो कार्यलय, हेटौंडा उपमहानगरपालिका र जिल्ला शिक्षा समन्वय कार्यलयमा १४ बुँदे मागपत्र बुझाएको छ । अखिल (समाजवादी) का केन्द्रिय सचिवालय सदस्य तथा उत्पादन विभागका सह इन्चार्ज विवेक सी र केन्द्रिय सदस्य तथा मकवानपुरका जिल्ला अध्यक्ष सुबास सीको नेतृत्वमा बुझाइएको मागपत्रमा शैक्षिक क्षेत्रका विविध समस्याहरु र विद्यार्थीहरुका हकहित र अधिकारको प्रावधानका विषयहरु समेटिएका छन् । बढ्दो समस्या समाधानका लागि विशेष पहल लिन संगठनले ध्यानाकर्षण गराएको हो ।
अखिल (समाजवादी) का केन्द्रिय सचिवालय सदस्य तथा मकवानपुरका इन्चार्ज सुर्य सी र केन्द्रिय सदस्य तथा मकवानपुरका जिल्ला अध्यक्ष सुबास सीको हस्ताक्षरमा भएको ध्यानाकर्षण पत्रमा नेपालको संविधान २०७२ को धारा ३१ मा व्यवस्था गरे अनुसार आधारभूत तह र माध्यमिक तहको निशुल्क र अनिवार्य शिक्षा पूर्ण रुपमा लागू गर्न, गराउन ध्यानाकर्षण गरेको छ । त्यस्तै विभिन्न शिर्षक र बहानामा निजि तथा सामुदायिक विद्यालयले लिइरहेको चर्को शुल्क खारेज गर्न, आवश्यकताको आधारमा भाषा माध्यमको प्रयोग गर्न, सामुदायिक विद्यालयको शैक्षिक गुणस्तर वृद्धि गराउने कार्ययोजना बनाइ लागू गराउन पनि माग गरेको छ । साथै निजि विद्यालयले दिनुपर्ने १० प्रतिशत छात्रवृत्ति धेरै जसो विद्यालयले नदिएको र लक्षित वर्गमा नपुगेको पाइएकाले तत्काल छानबिन गरि त्यस्ता विद्यालयहरुलाई छात्रवृत्ति प्रावधान कार्यन्वयन गर्न लगाउन तथा तोकेको शुल्क भन्दा बढी र अनावश्यक शिर्षकमा शुल्क लिने विद्यालयलाई नियमन गरि कारबाही गर्न समेत माग गरेको छ ।
त्यस्तै विद्यार्थीलाई सार्वजनिक तथा संस्थागत यातायातमा ४५ प्रतिशत भाडाछुटको प्रावधान कडाइपूर्वक लागू गराउन र नगरभित्रका घरकोठाहरुको नियमन गरि विद्यार्थीहरुका लागि सहुलियतपूर्ण तथा समान कोठाभाडा दर कायम गर्न अखिल (समाजवादी) मकवानपुरले हार्दिकताका साथ अपिल गरेको छ । यदि मागपत्रमा उल्लेखित सबै मागहरु समयमै पूरा नहुने र सम्बन्धित शैक्षिक संस्थाहरुले शिक्षा ऐन विपरीत मनोमानी गरेको पाइएमा अखिल (समाजवादी) मकवानपुर संघर्षमा होमिन बाध्य हुने र त्यसको जिम्मेवारी सम्बन्धित निकाय नै हुनुपर्ने कुरा समेत पत्रमा उल्लेख गरिएको छ ।
ध्यानाकर्षण पत्र :
