इटहरी। इटहरी उपमहानगरपालिका–१२ स्थित खनारमा रहेको तिरुपति प्लाइउड फ्याक्ट्रीमा बुधवार राति भीषण आगलागी भएको छ।
राति करिब २ बजेदेखि सुरु भएको आगो अहिलेसम्म पूर्ण रूपमा नियन्त्रणमा आउन सकेको छैन।आगलागी नियन्त्रणका लागि इटहरी, धरान, विराटनगर, बेलबारी, कानेपोखरी लगायत आसपासका १० भन्दा बढी स्थानीय तहबाट दमकलको सहयोग लिइएको छ। दमकल टोलीहरू नेपाली सेना, सशस्त्र प्रहरी र नेपाल प्रहरीको सहकार्यमा घटनास्थलमा खटिएका छन्। फ्याक्ट्रीमा रहेको काठ, प्लाइउड र कच्चा पदार्थ अत्यधिक ज्वलनशील भएका कारण आगो फैलनुका साथै नियन्त्रणमा कठिनाइ भएको बताइएको छ।
प्रारम्भिक अनुमानअनुसार ठूलो मात्रामा आर्थिक क्षति भएको छ, यद्यपि क्षतिको यकिन विवरण आउन बाँकी छ।स्थानीय बासिन्दाहरू पनि आगो नियन्त्रणमा स्वयंसेवकका रूपमा सहयोग गरिरहेका छन्। आगलागीको कारण खुल्न बाँकी रहे पनि प्रारम्भिक अनुसन्धानमा विद्युतीय सर्टको आशंका गरिएको छ।अधिक जानकारीका लागि सम्बन्धित निकायहरूबाट विवरण संकलन भइरहेको छ।
