मकवानपुर। मकवानपुर जिल्लाको थाहा नगरपालिका वडा नम्बर ४ रहेको किटीनीमा दिन-दहाडै दुईवटा घरमा चोरी भएको छ। बलराम केसी र बासुदेव केसीको घरमा आज चोरी हुन पुगेको जानकारीमा आएको हो।
आज दिउँसो करिब २ बजेदेखि ३ बजे समय अवधिको बीचमा घरमा कोही नभएको मौका पारी ती चोरहरूले ताला फोरेर घरमा राखिरहेको अवस्थामा रहेको नगद रु १ लाख ५ हजार र मोबाइल खुकुरीसमेत चोरी गरी लगिएको प्रहरीले बताएको छ।
जब गाउँमा यस घटना घट्यो त्यही घटनाको आशंकामा तीनजना व्यक्तिलाई पक्राउ गरी प्रहरीले अनुसन्धान प्रक्रिया अगाडि बढाएको जनाएको छ। गाउँमा चोरी भएपछि फरार अवस्थामा रहेको उनीहरूलाई प्रहरीले सोही दिनमा पक्राउ गरिएर उनीहरूसँग रहेको विभिन्न सामग्रीहरू फेला पारेका छन्।
चोरी घटनामा संलग्न रहेको आशंकामा पक्राउ पर्नेहरूमा सर्लाही जिल्लाको हरिवन नगरपालिका ९ बस्ने वर्ष ३० को सञ्जीव परियार, मकवानपुर जिल्लाको थाहा नगरपालिका २ देउराली टोलमा बस्ने वर्ष ३५ को कान्छा उर्फ प्रदीप पोडे र ललितपुर जिल्ला गोदावरी नगरपालिका १३ झरासी बस्ने वर्ष ३० को चमार भन्ने बिमल नेपाली रहेका छन्।
प्रहरीले घटनासँग जोडिएका भनिएका ती व्यक्तिहरूको साथबाट खन्तलासी गर्दा नगद रु ६८ हजार ९ सय ३१ रुपैयाँ प्राप्त गरेका छन् भने अन्य विभिन्न कम्पनीको नाममा रहेको मोबाइल एनसेल सिम कार्डहरू र सुन जस्तो पहिलो देखिने धातु पनि प्राप्त गरेका छन्। यस्तै औठी एक थान,खुकुरी एक थान,कटर,चाकु,एअरबोर्ट,घडी र मूर्ति एक एक थान लगायत अन्य विविध सामग्रीहरू उनीहरूको साथमा रहेको अवस्थामा प्रहरीले फेला पारेका छन्।
पीडित बलराम केसी र बासुदेव केसीले आफ्नो घरमा रहेको जिन्सी नगद सामान चोरी भएको विषयलाई लिएर इलाका प्रहरी कार्यालय पालुङमा रहेको विभिन्न प्रहरी चौकीमा छुट्टाछुट्टै जाहेरी दिएपछि चोरी तथा डाँका सम्बन्धी कसुरमा ती व्यक्तिहरूलाई मुद्दा दर्ता गरिएको बताएको छ।
त्यसपछि पक्राउ परेका तिनै जना व्यक्तिहरूलाई सोही मुद्दामा मुद्दा चलान गरी मकवानपुर जिल्ला अदालतबाट ८ दिनको म्याद थप गरी अनुसन्धान कार्य गरिरहेको प्रहरीले जनाएको छ।
