मकवानपुर । नेपाल कम्युनिस्ट पार्टी मकवानपुरले प्रहरी आतंक नरोके मकवानपुर बन्द गर्ने चेतावनी दिएको छ । पार्टीले शनिबार एक विज्ञप्ति जारी गर्दै यसो बताएको हो ।
जिल्ला सेक्रेटरी पेमा सीको हस्ताक्षरमा जारी भएको विज्ञप्तिमा नेकपाका केन्द्रिय सदस्य तथा मकवानपुरका जिल्ला इन्चार्ज राम सीका कान्छा भाइ बिक्रम घलानलाई मिति २०८२/०३/२४ गते राती ११ बजे मनहरी-३, डोठे स्थित आफ्नै घरमा सुतिरहेको ठाउँबाट बिनाकारण प्रहरीले कुटपिट गरि गुण्डगर्दी शैलीमा पक्राउ गरेको विषयप्रती घोर भर्त्सना गरेको छ । हिरासतमा राखिएका बिक्रम घलानलाई निसर्त रिहाइ गर्न माग गरेको छ । मिति २०८२/०३/०४ गते सार्वजनिक जमिन प्रकरणमा मुछिएको भनी हेटौंडा-१ का वडाध्यक्ष सबिन न्यौपानेमाथी सुकुम्बासी जनताले कालोमोसो दलि गरेको कारबाहीको विषयमा सत्यतथ्य छानबिन गरि दोषिलाई कारबाही गर्नुको साट्टो सत्ताधारी हुकुमबासीको इसारामा प्रतिशोध र राजनीतिक पूर्वाग्रहपूर्ण ढङ्गले मकवानपुरका एसपीको निर्देशनमा जनताको गाउँघरमा गइ दुख दिने, कुटपिट गर्ने र गल्ती नभएकालाई धरपकट गरि दुख दिने कार्य निन्दनीय भएको बताएको छ ।
यसरी अमानवीय र क्रुर युद्धको मानसिकताबाट अगाडि बढेको प्रहरी दमनको जमेर सामना गर्ने भनी विज्ञप्तिमा उल्लेख गरेको छ । अझै पनि हिरासतमा राखिएका सुकुम्बासी र विद्यार्थीलाई निसर्त रिहाइ नगरे मकवानपुर बन्दको कार्यक्रम अगाडि बढाउन बाध्य हुने जानकारी पनि विज्ञप्ति मार्फत गरेको छ । संघर्षको कार्यक्रम गर्नुपरेमा त्यसबाट हुने क्षतिको जिम्मा मकवानपुर प्रहरीले लिनुपर्ने विज्ञप्तिमा लेखिएको छ ।
साथै नेकपाले विज्ञप्ति मार्फत बढ्दो प्रहरी दमन रोक्न आम नागरिक, न्यायलय, सामाजिक अभियन्ता, कानुनी व्यवसाय, राजनीतिक दलहरु, पत्रकार तथा मानवअधिकार कर्मिमा हार्दिक अपिल गरेको छ ।
