काठमाडौं। उच्च अदालत पाटनले सर्वोच्च अदालतका निलम्बित शाखा अधिकृत महिमानसिंह विष्टसँग काठमाडौं जिल्ला अदालतले मागेको धरौटी रकमलाई सदर गरेको छ। विष्टमाथि नागरिक उन्मुक्ति पार्टीका संरक्षक रेशम चौधरीलाई नक्कली पत्रका आधारमा गैरकानुनी रूपमा पाँच घण्टा थुनामा राखेको अभियोग लागेको थियो।
गत वैशाख १७ गते विष्टले चौधरीलाई पक्राउ गर्नका लागि प्रहरी र डिल्लीबजार कारागारमा अनाधिकृत रूपमा पत्राचार गरेका थिए। पछि सर्वोच्च अदालतले उक्त पत्र सच्याएपछि मात्र चौधरी कारागारबाट मुक्त भएका थिए। अदालतको आदेशमा हस्तक्षेप गरी झुटा कागजात बनाएको आरोपमा विष्टमाथि कारबाही अगाडि बढाइएको थियो।
जिल्ला अदालतको आदेशलाई उच्च अदालत पाटनले सदर गरेसँगै अब विष्टलाई अदालतले तोकेको धरौटी रकम बुझाएर रिहा हुने बाटो खुलेको छ।
प्रतिकृया दिनुहोस्
