काठमाडौं। नेत्रहीन युवा संघ नेपाल, काठमाडौं उपत्यका शाखाले २६ औं अन्तर्राष्ट्रिय युवा दिवसको अवसर पारेर वक्तृत्वकला प्रतियोगिता सम्पन्न गरेको छ। ‘आधुनिक नेपाली समाजमा बहुविवाहको परिणाम’ शीर्षकमा आयोजित प्रतियोगितामा १४ जना प्रतियोगीहरूको सहभागीता रहेको थियो।
प्रतियोगितामा शिशिर चापागाईं प्रथम, जगत कुँवर मगर द्वितीय र विनीता सतार तृतीय भएका छन्। विजेताहरूलाई कार्यक्रमका प्रमुख अतिथि प्रतिनिधिसभा सदस्य सीता मिजारले पुरस्कार प्रदान गर्नुभएको थियो। कार्यक्रमलाई सम्बोधन गर्दै सांसद मिजारले नेत्रहीन युवा संघसँग सधैं निकट रहेर अपाङ्गता भएका व्यक्तिहरूको मुद्दालाई प्राथमिकताका साथ पहल र सम्बोधन गर्ने प्रतिबद्धतासमेत व्यक्त गर्नुभएको छ।
प्रतियोगितामा कलाधर भण्डारी, हिमालय शर्मा र सरिता लामिछानेले निर्णायकको भूमिका निर्वाह गर्नुभएको थियो। कार्यक्रमको सञ्चालन संस्थाका सचिव मदन रोकायाले गर्नुभएको थियो भने संस्थाकी कार्यसमिति सदस्य सरस्वती कठायतले मन्तव्य राख्नुभएको थियो।
संस्थाका सचिव रोकायाले नेत्रहीन युवा संघले अन्य अपाङ्गता भएका युवाहरूलाई जोड्दै विभिन्न दिवस तथा विशेष दिनहरूमा यस्ता रचनात्मक कार्यक्रमहरू गर्दै जाने जानकारी दिनुभएको छ। आयोजित कार्यक्रममा ३५ जनाको सहभागिता रहेको थियो।
