दार्चुला, भदौ ५ गते । दार्चुलाको नौगाड गाउँपालिकामा आज बिहान जीप दुर्घटना हुँदा ११ जना घाइते भएका छन् । होपरीबाट होपरीगाडतर्फ जाँदै गरेको सुप प्र ०४००१ ज ०१०३ नम्बरको जीप अनियन्त्रित भई दुर्घटनामा परेको जिल्ला प्रहरी कार्यालय दार्चुलाले जनाएको छ ।
दुर्घटनामा घाइते भएकामध्ये ४ जनाको अवस्था गम्भीर रहेको प्रहरी निरीक्षक एवं सूचना अधिकारी छत्रबहादुर रावतले जानकारी दिए । गम्भीर घाइते हुनेमा २५ वर्षीया पार्वती टमटा, २६ वर्षीय मोहन ठगुन्ना, १८ वर्षीया अप्सरा महता र ३५ वर्षीय उमेश ठगुन्ना रहेका छन् ।
सबै घाइतेहरूको उद्धार गरी तत्काल उपचारका लागि गोकुलेश्वर अस्पताल पठाइएको प्रहरीले जनाएको छ । दुर्घटनाको कारण खुल्न बाँकी रहेको र थप अनुसन्धान भइरहेको जनाइएको छ ।
प्रतिकृया दिनुहोस्
