हेटौँडा, भदौ २२ गते । हेटौँडा उपमहानगरपालिका परिसरबाट भदौ २३ गते अर्थात भोलि सोमबार बिहान १०:०० बजे युवा पुस्ताले सामाजिक सञ्जाल प्रतिबन्ध र बढ्दो भ्रष्टाचारविरुद्ध विशाल प्रदर्शन गर्ने भएका छन्।
“Gen Z Led Mass Protest in Nepal” नाम दिइएको उक्त प्रदर्शन पूर्णत: शान्तिपूर्ण र गैरराजनीतिक रहने आयोजकहरूले जनाएका छन्। उनीहरूले कुनै राजनीतिक दलसँग सम्बन्ध नराखी केवल राष्ट्रिय झण्डा बोकेर सहभागी हुन आग्रह गरेका छन्।
प्रदर्शन हेटौँडा उपमहानगरपालिका परिसरबाट सुरु भई सानो पोखरा, बुद्धचोक हुँदै उपमहानगर रोडसम्म हुने कार्यक्रम तय गरिएको छ।
मुख्य मागहरूमा भ्रष्टाचार अन्त्य, प्रशासनिक दुरुपयोगको विरुद्ध जनचेतना अभिवृद्धि, जवाफदेही र पारदर्शिता सुनिश्चित गर्ने लगायतका विषयहरू रहेका छन्। “भ्रष्टाचारविरुद्धको लडाइँ केवल नारामा सीमित छैन, इमानदारी, पारदर्शिता र जवाफदेहीपनामा अभ्यास गरेर नयाँ पुस्ताले उदाहरण देखाउने समय आएको छ,” आयोजकहरूले सन्देशमा उल्लेख गरेका छन्।
