काठमाडौं, भदौ २५ गते । धरान उपमहानगरपालिकाका मेयर हर्क सम्पाङ काठमाडौँ आइपुगेका छन्। काठमाडौँ आगमनपछि पत्रकारहरूले राखेका प्रश्नमा उनले आफू यहाँ जेन जि नयाँ पुस्ताको आग्रहमा मात्र आएको स्पष्ट पारेका छन्।
सम्पाङले आर्मी चिफसँग भेटवार्ता भए पनि छलफल र निष्कर्ष भने पहिले नै टुंगिएको जानकारी पाएको बताए। उनका अनुसार पूर्व न्यायाधीश सुशिला कार्कीलाई नेतृत्वका लागि चयन गर्ने विषयमा निर्णय भइसकेको रहेछ। यसबारे आफ्नो धारणा प्रष्ट पार्दै सम्पाङले भने, “म को नै होर, मैले चुन्ने नचुन्ने भन्दा पनि यो देश अहिले पूर्णरुपमा जेन जि पुस्ताको हो। उहाँहरूको निर्णय नै सर्वोपरि हुन्छ। त्यसैले यसमा मेरो सहमति–असहमति भन्ने हुँदैन।”
प्रधानमन्त्रीको नेतृत्व सम्हाल्न सक्ने या नसक्ने भन्ने पत्रकारको प्रश्नमा सम्पाङले भने, “यदि जेन जि नयाँ पुस्ताले र देशको अहिलेको आवश्यकता अनुसार मलाई नेतृत्व सुम्पिएमा म अवश्य पनि यसको जिम्मेवारी सम्हाल्न सक्छु। त्यसका लागि सबैको विश्वास र भरोसा ममा रहनुपर्छ।”
यसरी सम्पाङले आफू जेन जि पुस्ताको निर्णयलाई नै प्रमुख मान्ने र आवश्यक परे देशको नेतृत्व सम्हाल्न तयार रहेको स्पष्ट पारेका छन्।
