बारा, कलैया, भदौ २६ गते । जिल्लाको शान्ति सुरक्षा र अमन चयन कायम गर्न बारा जिल्लामा कर्फ्यु आदेश जारी गरिएको छ। प्रमुख जिल्ला अधिकारी प्रकाश पौडेलले मिति २०८२ साल भदौ २६ गते साँझ ८ बजेदेखि भदौ २७ गते बिहान ६ बजेसम्मका लागि कर्फ्यु आदेश लागू गरिएको जानकारी दिएका छन्।
हालको विषम परिस्थितिको अनुचित फाइदा उठाउँदै सार्वजनिक सम्पत्ति नोक्सान गर्ने, लुटपाट तथा आगजनी गर्ने, हिंसात्मक आक्रमणजस्ता गतिविधि हुन नदिन स्थानीय प्रशासन ऐन २०२८ को दफा ६ (क) र (ख) बमोजिम आदेश जारी गरिएको हो।
कर्फ्यु अवधिमा कसैले पनि आउजाउ, भेला, जुलुस, प्रदर्शन, सभा, बैठक तथा घेराउ गर्न पाउने छैनन्। तर अत्यावश्यक सेवाका सवारी साधन जस्तै एम्बुलेन्स, दमकल, शववाहन, स्वास्थ्यकर्मी, सञ्चारकर्मी, पर्यटक, मानव अधिकार तथा कूटनीतिक नियोगका सवारी साधनहरू र हवाई टिकट देखाउने यात्रुहरूको आवागमनमा भने सुरक्षाकर्मीमार्फत सहजीकरण गरिने प्रशासनले जनाएको छ।
