नवलपुर, कावासोती, कार्तिक २ गते । नेपाल प्रहरीका महानिरीक्षक (आईजीपी) चन्द्र कुबेर खापुङ्गले आइतबार एक विशेष समारोह बीच कावासोती स्थित नवनिर्मित प्रहरी कल्याण कोष पेट्रोल पम्पको उद्घाटन गरेका छन् ।
उद्घाटन कार्यक्रममा आईजीपी खापुङ्गले पेट्रोल पम्प र भवनको निरीक्षण गर्नुका साथै कार्यालय परिसरमा वृक्षारोपण पनि गरेका छन् ।
सो अवसरमा उनले नेपाल प्रहरीले समाजमा शान्ति–सुरक्षा कायम राख्न हरेक समुदाय र क्षेत्रसँग सहकार्य गर्दै आएको बताएका छन् । उनका अनुसार नवनिर्मित प्रहरी पेट्रोल पम्पले प्रहरी कर्मचारी र स्थानीय नागरिकलाई गुणस्तरीय इन्धन उपलब्ध गराउने मात्र नभई प्रहरी र नागरिक बीचको समन्वय, सहकार्य र विश्वास सुदृढ गर्न मद्दत गर्नेछ।
आईजीपी खापुङ्गले नेपाल प्रहरी शान्ति, सुरक्षा र कानुन कार्यान्वयनमा अग्रपंक्तिमा रहने राज्यको भरोसा योग्य संस्था भएको बताउँदै जनअपेक्षा अनुरूप नागरिक मैत्री सेवा प्रवाह गर्न प्रहरी सदस्यहरूलाई निर्देशन दिएका छन् ।
कार्यक्रममा कावासोती नगरपालिकाका प्रमुख विष्णु प्रसाद भुसाल र नवलपरासी पूर्वका प्रमुख जिल्ला अधिकारी भविश्चर पाण्डेले शुभकामना मन्तव्य व्यक्त गरेका थिए।
त्यसैगरी, गण्डकी प्रदेश प्रहरी कार्यालयका प्रमुख प्रहरी नायव महानिरीक्षक दिनेश कुमार आचार्यले धन्यवाद मन्तव्य व्यक्त गरेका थिए । भने प्रहरी वरिष्ठ उपरीक्षक संजय सिंह थापाले स्वागत मन्तव्य दिएको थियो।
कार्यक्रममा प्राविधिक प्रहरी नायव उपरीक्षक चिरञ्जिवी महतोले निर्माण सम्बन्धी प्रतिवेदन प्रस्तुत गरेका थिए । नेपाल प्रहरी कल्याण कोषको कुल लागत १० करोड ९८ लाख ८ हजार ९ सय ६६ रुपैयाँमा पेट्रोल पम्प र पूर्वाधार निर्माण कार्य सम्पन्न गरिएको हो।
उक्त कार्यक्रममा प्रहरी नायव महानिरीक्षकहरू, वरिष्ठ प्रहरी अधिकृतहरू, जिल्लास्थित सुरक्षा निकायका प्रमुखहरू, सरकारी कार्यालयका प्रतिनिधिहरू, स्थानीय जनप्रतिनिधिहरू, संघसंस्थाका पदाधिकारी, सञ्चारकर्मी, बुद्धिजीवी र प्रहरी कर्मचारीहरूको समेत उपस्थिती रहेको थियो।
