भक्तपुर, कार्तिक ११ गते । राष्ट्रिय परीक्षा बोर्ड, परीक्षा नियन्त्रण कार्यालय (कक्षा ११ र १२) सानोठिमी, भक्तपुरले शैक्षिक सत्र २०८२/८३ मा कक्षा ११ मा भर्ना भएका विद्यार्थीहरूको विषय दर्ता फारम बुझाउने म्याद थप गरेको छ।
यसअघि प्रकाशित कार्यतालिका अनुसार मिति २०८२ कार्तिक १५ गतेसम्म बिलम्ब शुल्कबिनै प्रति विद्यार्थी रु ४०० र कार्तिक मसान्तसम्म बिलम्ब शुल्कसहित प्रति विद्यार्थी रु ८०० का दरले फारम बुझाउने व्यवस्था गरिएको थियो। तर, कक्षा १० (एसइइ) को पूरक परीक्षाका प्रमाणपत्र विद्यालयमा समयमै उपलब्ध नहुँदा म्याद थप गरिएको परीक्षा नियन्त्रण कार्यालयले जनाएको छ।
नवीन व्यवस्थाअनुसार अब विद्यार्थीहरूले मिति २०८२ कार्तिक मसान्तसम्म बिलम्ब शुल्कबिनै प्रति विद्यार्थी रु ४०० तिरेर फारम बुझाउन सक्नेछन्। त्यसपछि मङ्सिर ७ गतेसम्म बिलम्ब शुल्कसहित प्रति विद्यार्थी रु ८०० का दरले रकम राष्ट्रिय परीक्षा बोर्डको बैंक खातामा दाखिला गरी मङ्सिर १० गतेभित्र अनलाइन इन्ट्रीसहित सम्बन्धित बोर्ड कार्यालयमा फारम बुझाउन सकिनेछ।
परीक्षा नियन्त्रण कार्यालयले बोर्डका सम्पूर्ण कार्यालयहरूलाई आफ्नो कार्यक्षेत्रभित्रका विद्यालयहरूलाई यस सूचना बमोजिम जानकारी गराई आवश्यक प्रक्रिया पूरा गर्न अनुरोध गरेको छ।
