हेटौडा, कात्तिक १७ गते । गैरसरकारी संस्था महासंघ नेपालले हालको राजनीतिक परिवेशमा नागरिक समाज र गैरसरकारी संस्थाहरूमाथि नियोजित रूपमा भ्रम, आरोप र हल्ला फैलाउने गतिविधिप्रति गम्भीर चिन्ता व्यक्त गरेको छ। महासंघले यस्तो प्रवृत्तिले लोकतन्त्र, संविधान र मानव अधिकारका मूल मूल्यमा प्रहार गरेको ठहर गर्दै नागरिक समाजको ऐतिहासिक योगदानको अवमूल्यन अस्वीकार्य रहेको जनाएको छ।
महासंघले नागरिक समाजमाथिको अविश्वास र निराधार आरोपहरू लोकतान्त्रिक मूल्य र सिद्धान्तमाथि प्रहार भएको उल्लेख गर्दै, राज्य, राजनीतिक दल र नागरिक समाज सबैले आत्मसमिक्षा गर्दै उत्तरदायित्वपूर्ण साझेदारीमा अघि बढ्नुपर्ने आवश्यकता औंल्याएको छ।
हालैको जेन जि आन्दोलनपछि केही राजनीतिक वृत्त, सञ्चारमाध्यम र सामाजिक सञ्जालमा आएका टिप्पणीहरूले नागरिक समाजको भूमिकामाथि प्रश्न उठाएको प्रसंगमा महासंघले चिन्ता व्यक्त गरेको हो। महासंघका अनुसार यस्तो प्रवृत्तिले संविधानले प्रत्याभूत गरेका राजनीतिक तथा नागरिक अधिकार कमजोर पार्ने खतरा निम्त्याउँछ र संस्थागत अविश्वास बढाउँछ।
विज्ञप्तिमा गैरसरकारी संस्थाहरू संविधान, कानुन र नीति विधिअनुसार दर्ता भई सेवा सुविधा नपुगेका नागरिक र पछाडि पारिएका समुदायका अधिकार सुनिश्चित गर्न काम गर्दै आएको उल्लेख गरिएको छ। साथै, यी संस्थाहरू लोकतन्त्र, मानव अधिकार, सुशासन र बहुलवादका पक्षमा प्रतिबद्ध रहेको स्पष्ट गरिएको छ।
जेन जि आन्दोलनका युवाहरूले उठाएका मागहरू न्यायोचित रहेको भन्दै महासंघले मुलुकलाई भ्रष्टाचारमुक्त र उत्तरदायी बनाउन विद्युतीय शासन प्रणाली तथा चुस्त अनुगमन संयन्त्र तत्काल लागू गर्न सरकारलाई आग्रह गरेको छ।
आन्दोलनका क्रममा भएका हिंसात्मक घटना र सम्पत्ति क्षतिप्रति दुःख व्यक्त गर्दै महासंघले ती घटनाको निष्पक्ष छानबिनका लागि कार्की आयोग र राष्ट्रिय मानव अधिकार आयोगलाई पहल गर्न अपिल गरेको छ।
