काठमाडौँ, मंसिर २ गते । जेन जि मुभमेन्ट नेपालले व्यवसायी दुर्गा प्रसाईको पक्राउलाई लोकतान्त्रिक मूल्य–मान्यतामाथिको प्रहार र राजनीतिक प्रतिशोधको घटना भएको दाबी गरेको छ। संगठनले जारी गरेको बयानमा प्रसाईलाई निशाना बनाउन “विद्रोह हतियाउने शक्ति–गठबन्धन” सक्रिय रहेको आरोप लगाइएको छ।
मुभमेन्टका अनुसार पूर्वप्रधानन्यायाधीश सुशीला कार्की र अधिवक्ता ओमप्रकाश अर्याल नेतृत्वमा रहेको समूहले भाद्र २४ मा देखापरेको जेन जि विद्रोहलाई कमजोर पार्ने उद्देश्यका साथ परिस्थिति अस्थिरतातर्फ मोड्ने प्रयास गरेको थियो। बयानमा भनिएको छ–
“विद्रोह अपहरण गर्ने योजना सार्वजनिक गर्ने व्यक्तिलाई नियन्त्रणमा लिने राज्यको व्यवहार दमनकारी शासनशैलीको नमुना हो।”
संगठनले घटनाबाट सञ्चित ‘षड्यन्त्रका प्रमाण’ बाहिर ल्याउने क्रममै प्रसाईलाई लक्षित गर्दै गिरफ्तर गरिएको आफ्नो ठहर प्रस्तुत गरेको छ। साथै, भाद्र २४ को दिन युवाहरूलाई उद्देलित बनाइ राज्यलाई अनियन्त्रित बनाउने प्रयासमा लागेको शक्तिगठबन्धनलाई तत्काल नियन्त्रणमा लिन नेपाली सेनाले कदम चाल्नुपर्ने मागसमेत वक्तव्यमा उल्लेख गरिएको छ।
दुर्गा प्रसाईको तत्काल रिहाइको माग गर्दै जेन्जी मुभमेन्टले आगामी दिनहरूमा सडकहरूमा प्रतिरोध तीव्र बनाउन सकिने चेतावनी दिएको छ। परिवर्तनका पक्षमा उभिन चाहने सबैलाई संगठनले “सजग र संगठनबद्ध” रहन आह्वान गरेको छ। वक्तव्यमा प्रवक्ता विजय शाहको हस्ताक्षर छ।
