हेटौडा, मंसिर १४ गते । सडक डिभिजन कार्यालय हेटौडाले पत्रकार सम्मेलन आयोजना गरी लामो समयदेखि चलिरहेको सडक विस्तार सम्बन्धी सबै विवाद, कानुनी अवस्था र हालसम्मको प्रगतिबारे विस्तृत जानकारी सार्वजनिक गरेको छ। पत्रकार सम्मेलनमा डिभिजन कार्यालयका प्रमुख गुरुप्रसाद अधिकारीले सडक विस्तारका लागि आवश्यक सबै प्रक्रिया अन्तिम तयारीमा पुगेको बताएका छन्।
उनका अनुसार सडक निर्माण तथा विस्तारसँग जोडिएका विभिन्न सरोकारवालाहरूबाट हालसम्म करिब ३४३ वटा मुद्दा दर्ता भएका छन्। तीमध्ये केही उच्च अदालत पाटन र सर्वोच्च अदालतसम्म पुगे पनि, कानुनी निर्णयहरूले सडक विस्तारको कार्यलाई वैधानिक रूपमा अघि बढाउन अनुमोदन गरेको उनले स्पष्ट पारे।
अधिकारीका अनुसार—
उच्च अदालत पाटनमा नौ वटा मुद्दा परेकोमा रिट निवेदकका मागअनुसार अंतरिम आदेश जारी गर्नुपर्ने कुनै अवस्था देखिएन।
२०७३ सालमै अदालतले महत्वपूर्ण फैसला गर्दै राजमार्ग व्यवस्थापन ऐन २०२१ अनुसार २५–२५ मिटर गजको सडक क्षेत्र भित्र पर्ने अतिक्रमित संरचनामा मुआब्जा दिनुपर्ने प्रावधान स्पष्ट पारेको थियो।
त्यसपछि २०८० सालमा सर्वोच्च अदालतमा परेको १४ जनाको मुद्दा पनि सोही वर्ष खारेज भएको उनले उल्लेख गरे। २०८० साल मंसिर १७ गते सर्वोच्चको फैसला हालको सडक विस्तारको मुख्य कानुनी आधार भएको डिभिजन कार्यालयले जनाएको छ।
अधिकारीले हालसम्म गरिएको सर्वेक्षणअनुसार ५३१ वटा घर–टहरा सडक विस्तार क्षेत्रमा पर्ने बताउँदै त्यसमध्ये “पूर्ण रूपमा घरबारविहीन हुन्छु” भनेर अहिलेसम्म कुनै पनि घरधनीले डिभिजन कार्यालयमा निवेदन नदिएको जानकारी दिए। यदि त्यस्तो अवस्था भएमा सम्बन्धित व्यक्तिले हेटौंडा उपमहानगरपालिका मार्फत निवेदन दिन सक्ने र आपसी समन्वयमै प्रक्रिया अघि बढाइने उनले बताए।
डिभिजन कार्यालयले १५ दिने सूचना प्रकाशित गरेपछि आन्तरिक तयारी, सिमाङ्कन, अन्तर–निकाय समन्वय र वैकल्पिक मार्ग पहिचानका सबै कार्य पूरा भएको जनाएको छ। अधिकारीका अनुसार आवश्यक उपकरण, जनशक्ति र सुरक्षा व्यवस्थापनका सबै पक्ष तयारी अवस्थामा छन्।
घरसँग सम्बन्धित संरचना भत्काउने कार्यबारे अधिकारीले भने, “कामलाई जोखिम न्यून हुने गरी केन्द्रिय स्थानबाट सुरु गरिनेछ। भत्काइएका संरचना २५ दिनभित्र पूर्ण रुपमा क्लियर गरिने लक्ष्य राखिएको छ।”
मिति पर सर्न सक्ने सम्भावनाबारे सोधिएको प्रश्नमा उनले स्पष्ट रूपमा भने, “अब सीमा अवधि थपिने अवस्था छैन। तोकिएको मिति अनुसार नै काम अगाडि बढ्छ।”
अधिकारीका अनुसार मंसिर २० गतेबाट सडक विस्तारको काम निरन्तर सुरु हुनेछ। उनले यस महत्वपूर्ण सार्वजनिक संरचना विकासमा स्थानीयवासी, सञ्चारकर्मी तथा सबै सरोकारवालाको साथ–समर्थन आवश्यक रहेको उल्लेख गरे।
