हेटौँडा, मंसिर १९ गते । सडक डिभिजन कार्यालय हेटौडाले जारी गरेको १५ दिने सूचना आज रातिदेखि सकिँदै जाँदा भोलिदेखि हेटौँडामा डोजर चल्ने–नचल्ने भन्ने बुझाइलाई स्पष्ट गर्दै मकवानपुरका सहायक प्रमुख जिल्ला अधिकारी (सीडीओ) मोहनराज जोशीले आवश्यक तयारी पूरा भइसकेको बताएका छन्।
मंसिर ५ गते सडक विस्तारका लागि बजार क्षेत्र खाली गराउन घरधनी तथा व्यवसायीलाई १५ दिने सूचना जारी गरिएको थियो। उक्त समयसीमा आज सकिँदैछ। सूचनाअनुसार तोकिएको क्षेत्रभित्र रहेका संरचनाहरू स्वतः नहटेमा भोलिदेखि सडक डिभिजनले नै हटाउने प्रक्रियामा अघि बढ्ने बताइएको छ।
सहायक सीडीओ जोशीका अनुसार हटाउने क्रममा सम्भावित अवरोध र प्रतिरोधलाई ध्यानमा राख्दै जिल्ला प्रशासन कार्यालयले शान्ति–सुरक्षा कायम राख्दै आवश्यक सुरक्षा बल परिचालन गर्न तयारी पूरा गरिसकेको छ। यसका लागि जिल्ला प्रशासन र सडक डिभिजन कार्यालयले संयुक्त रूपमा सुरक्षा टास्क फोर्स गठन गरिसकेको समेत उनले जानकारी दिए।
“सडक डिभिजनको निर्देशनअनुसार आवश्यक ठाउँमा सुरक्षा टास्क फोर्स परिचालन हुन्छ। परिस्थितिअनुसार सुरक्षाको घेराबन्दी कति हुनु पर्ने हो, त्यसैअनुसार बल प्रयोग हुनेछ,” जोशीले भने।
पत्रकारहरूले सर्वोच्च अदालतबाट आएको रोक आदेशसम्बन्धी प्रश्न उठाउँदा जोशीले अहिले सम्म जिल्ला प्रशासनलाई कुनै आधिकारिक पत्र प्राप्त नभएको बताए।
“सञ्चारमाध्यम र सामाजिक सञ्जालमार्फत सूचना आएको देखिन्छ तर आधिकारिक पत्र हाम्रो निकायमा आएको छैन। त्यसैले भोलिको कार्यमा तत्काल कुनै रोक छैन,” उनले स्पष्ट पारे।
उनका अनुसार अब आधिकारिक पत्र प्राप्त भएपछिको निर्देशन अनुसार मात्र प्रशासनले अर्को निर्णय लिन सक्नेछ।
“अहिले भने हिजो–अस्तिदेखि बनेको तयारीमै हामी अघि बढिरहेका छौँ,” उनले भने।
जोशीका अनुसार सम्भावित हड्ताल, विरोध वा अवरोधका अवस्थालाई मध्यनजर गर्दै जिल्ला सुरक्षा समितिले आवश्यकता अनुसार सुरक्षात्मक संयन्त्र तत्पर राखेको छ।
भोलि बिहानैदेखि संरचना हटाउने मेसिनरी तथा जनशक्ति परिचालन गरिने सडक डिभिजन कार्यालयले जनाएको छ।
