काठमाडौं, मंसिर २१ गते । प्रेस काउन्सिल नेपालका नवनियुक्त अध्यक्ष कुमार शर्मा आचार्यले आइतबार सञ्चार तथा सूचना प्रविधि मन्त्रालय पुगेर आफ्नो नियुक्ति पत्र ग्रहण गरेका छन्। मन्त्री जगदीश खरेलले उनलाई रिक्त पदका लागि सरकारले गरेको मनोनयनअनुसार औपचारिक रूपमा नियुक्ति पत्र प्रदान गरेका हुन्।
नियुक्ति कार्यक्रमलाई सम्बोधन गर्दै मन्त्री खरेलले हालको सञ्चार वातावरणलाई व्यवस्थित र जिम्मेवार बनाउन प्रेस काउन्सिलले अग्रसर भूमिकामा रहनुपर्ने आवश्यकता दोहोर्याए। उनले आम सञ्चारमाध्यमदेखि नयाँ डिजिटल मिडियासम्म सबैलाई मर्यादित, पारदर्शी र जनउत्तरदायी बनाउने दिशामा काउन्सिलले प्रभावकारी कदम चाल्नुपर्नेमा जोड दिए।
मन्त्री खरेलका अनुसार संविधान र प्रचलित कानुनको दायरा भित्र रहेर सञ्चार क्षेत्रको सुधार सम्भव छ, र त्यसका लागि काउन्सिललाई सक्रिय भएर अघि बढ्न उनका शब्दमा “समयको माग” छ। भ्रष्टाचार नियन्त्रण र सुशासन कायम गर्ने सरकारको प्राथमिकताबीचै केही जिम्मेवार व्यक्तिहरूबाटै भ्रामक सूचना प्रसारण हुनु दुर्भाग्यपूर्ण भएको उनले टिप्पणी गरे।
साइबर सुरक्षालाई सरकारको मुख्य चुनौती भन्दै मन्त्री खरेलले झुट्टा, भ्रामक र गलत सूचनाबाट जनमानस प्रभावित नहोस् भन्ने उद्देश्यका साथ राज्य संयन्त्र सक्रिय रहेको जानकारी गराए।
