हेटौंडा,पुस ११ गते । राष्ट्रिय आदिवासी जनजाति महिला महासंघ प्रदेश समन्वय परिषद् बागमतीको अध्यक्षमा देवीमाया लिम्बू सर्वसम्मत रूपमा चयन भएको छ। आज सम्पन्न महासंघको तेस्रो प्रदेश अधिवेशनले लिम्बूको नेतृत्वमा ९ सदस्यीय नयाँ कार्यसमिति निर्विरोध चयन गरेको हो।
नवगठित कार्यसमितिको उपाध्यक्षमा जानकी कुमारी चौधरी, सचिवमा प्रतिक्षा माझी, सहसचिवमा सानुमाया गुरुङ तथा कोषाध्यक्षमा राधा कारनजीत चयन भएको छ। त्यसैगरी सदस्यहरूमा मैना दनुवार, बिना बोटे, मन्जु शेर्पा र रामकुमारी थामी चयन भएका छन्।
अधिवेशनको निर्वाचन प्रक्रिया निर्वाचन मण्डल समितिकी संयोजक अधिवक्ता कौशिला राई, केन्द्रीय अध्यक्ष तथा निर्वाचन मण्डलकी सदस्य ङिमी शेर्पा र केन्द्रीय सचिव तथा निर्वाचन मण्डलकी सदस्य सनम राजवंशीले सञ्चालन गरेको थियो।
नयाँ नेतृत्व चयनसँगै बागमती प्रदेशमा आदिवासी जनजाति महिलाको अधिकार, पहिचान र सशक्तीकरणका विषयमा महासंघले अझ प्रभावकारी भूमिका खेल्ने विश्वास व्यक्त गरिएको छ।
