हेटौंडा,पुस ११ गते । श्रम संस्कृति पार्टीका केन्द्रीय सदस्य तथा जिल्ला इन्चार्ज सुन्दर लामाले देशको वर्तमान अवस्था, व्यक्तिगत जीवनदर्शन र राष्ट्रप्रतिको प्रतिबद्धता झल्किने भावुक अभिव्यक्ति सार्वजनिक गरेको छ। सामाजिक सञ्जाल फेसबुकमार्फत उनले गरिबी, नैतिकता, समानता र राष्ट्र परिवर्तनको सपना बारे आफ्नो धारणा सार्वजनिक गरिएको हो।
लामाले नेपाल गरिबी र अभावमा रहेको यथार्थ स्वीकार गर्दै आफू पनि त्यही अवस्थाको अनुभूति गरिरहेको उल्लेख गरेको छ। तथापि, गरिबीमै सन्तुष्टि खोज्नु र आम नेपाली जनताको जीवनशैलीसँग आफ्नो जीवनशैली फरक नहोस् भन्ने चाहना उनको स्टाटसमा प्रष्ट देखिन्छ। “हे भगवान, नेपाली साधारण जनताको जीवनशैली र मेरो जीवनशैलीमा कहिल्यै फरक नहोस्,” भन्दै उनले समानता र विभेदरहित समाजको कामना गरेको छ।
उनले आफू पछिल्ला १५ वर्षदेखि राष्ट्रको मुहार फेर्न दिलो ज्यान दिएर लागेको दाबी गर्दै, आफ्नो त्याग र तपस्याको मूल्यांकन एक दिन अवश्य हुने विश्वास व्यक्त गरेको छ। “सत्य एक दिन अवश्य साबित हुनेछ, बादल फाट्नेछ र सुन्दर बिहानीको किरण उदाउनेछ,” भन्ने उनको भनाइले आशा र परिवर्तन प्रतिको दृढ विश्वास झल्काउँछ।
लामाले इतिहास बारम्बार नआउने भन्दै वर्तमानलाई चिन्ने र बुझ्ने बेला आएको उल्लेख गरेको छ। उनको यो अभिव्यक्ति व्यक्तिगत भावनासँगै राजनीतिक प्रतिबद्धता, श्रम संस्कृति र राष्ट्र प्रेमको सन्देशका रूपमा हेरिएको छ।
