काठमाडौँ,पुस १३ गते। नेपाली राजनीतिमा एउटा ठुलो उथलपुथल ल्याउने गरी काठमाडौँ महानगरपालिकाका प्रमुख बालेन्द्र (बालेन) शाह र राष्ट्रिय स्वतन्त्र पार्टी (रास्वपा) बीच औपचारिक एकता भएको छ। आइतबार बिहान ४ बजे नेता असिम शाहको निवासमा करिब ४८ घण्टा चलेको लामो र गोप्य छलफलपछि दुई पक्षबीच सात बुँदे राजनीतिक सहमति जुटेको हो।
यस सहमतिसँगै अब बालेन शाह रास्वपाको तर्फबाट आगामी प्रतिनिधि सभा निर्वाचनपछि संसदीय दलको नेता र भावी प्रधानमन्त्रीको उम्मेदवार बन्ने निश्चित भएको छ भने पार्टीको नेतृत्व रवि लामिछानेले नै सम्हाल्नेछन्। सहमति पत्रमा हस्ताक्षर गर्दै दुवै पक्षले नवयुवाहरूले भ्रष्टाचार र कुशासन विरुद्ध गरेको आन्दोलनको अपनत्व लिने र १० वर्षभित्र नेपाललाई मध्यम-आय भएको राष्ट्र बनाउने आर्थिक मार्गचित्र कार्यान्वयन गर्ने साझा सङ्कल्प गरेका छन्।
एकीकृत पार्टीको नाम ‘राष्ट्रिय स्वतन्त्र पार्टी’, चुनाव चिह्न ‘घण्टी’ र झण्डा साविककै रहने निर्णय भएको छ। हस्ताक्षर समारोहमा रास्वपाका शीर्ष नेताहरू डीपी अर्याल, डा. स्वर्णिम वाग्ले, शिशिर खनालका साथै अभियन्ताहरू केपी खनाल, सुदिप ढकाल र कलाकार निश्चल बस्नेतको समेत उपस्थिति रहेको थियो। यो एकताले वैकल्पिक राजनीतिक शक्तिहरूलाई एउटै केन्द्रमा ल्याउने लक्ष्य राखेको छ।
दुई पक्षबीच भएका सहमतिका ७ बुँदाहरू निम्न छन्:
१. भ्रष्टाचार विरुद्धको युवा आन्दोलनलाई स्वामित्व दिँदै सहिद र घाइते परिवारका माग सम्बोधन गर्ने।
२. नीतिगत सुधार मार्फत १० वर्षभित्र नेपाललाई मध्यम आय भएको विकसित मुलुक बनाउने।
३. पार्टीको नाम ‘राष्ट्रिय स्वतन्त्र पार्टी’, चुनाव चिह्न ‘घण्टी’ र निलो झण्डा नै कायम राख्ने।
४. रवि लामिछाने पार्टी सभापति रहने र बालेन शाह भावी प्रधानमन्त्रीको उम्मेदवार बन्ने।
५. योग्यता र क्षमताका आधारमा विज्ञ तथा युवा अभियन्ताहरूलाई पार्टीका विभिन्न पदमा समायोजन गर्ने।
६. एकताका सम्पूर्ण निर्णय र दस्ताबेजहरू निर्वाचन आयोगमा आधिकारिक रूपमा अद्यावधिक गर्ने।
७. परिवर्तनकारी र सुसंस्कृत राजनीति चाहने अन्य शक्ति तथा व्यक्तिहरूलाई एकतामा आउन आह्वान गर्ने।
