काठमाडौँ,पुस १३ गते। नेपाली राजनीतिको रङ्गमञ्चमा एउटा अप्रत्याशित र अर्थपूर्ण हलचल उत्पन्न गर्दै राष्ट्रिय स्वतन्त्र पार्टी (रास्वपा) र काठमाडौँका मेयर बालेन शाहबीच आगामी राजनीतिक यात्रामा एकसाथ अगाडि बढ्ने औपचारिक समझदारी भएको छ।
शनिबार भएको सघन छलफलपछि आइतबार बिहान ४ बजे एउटा निष्कर्षमा पुगेसँगै अब बालेन शाह रास्वपाकै झन्डा र चुनाव चिह्न बोकेर प्रधानमन्त्रीको उम्मेदवारका रूपमा प्रस्तुत हुने र पार्टीको आन्तरिक नेतृत्वमा भने रवि लामिछाने नै रहने गरी शक्ति बाँडफाँट गरिएको छ। यो समझदारीले एउटा पक्षमा उत्साह सञ्चार गराइरहँदा आफ्नै नेतृत्वमा ‘श्रम संस्कृति पार्टी’ खोलेर आफ्नो छुट्टै राजनीतिक जग खनिरहेका धरानका मेयर हर्क साम्पाङले भने तीव्र असन्तुष्टि पोख्दै यसलाई ‘विदेशी हस्तक्षेपलाई संस्थागत गर्ने प्रपञ्च’ को संज्ञा दिएका छन्।
मेयर साम्पाङले बालेन र रास्वपाबीचको यो सहकार्यलाई सत्ताका लागि गरिएको सम्झौताको रूपमा व्याख्या गरेका छन्। आइतबार बिहानै भिडिओ सन्देश जारी गर्दै उनले बालेनको कार्यशैलीमाथि कडा प्रहार गरे। साम्पाङले सहकारी काण्डदेखि एमसिसीजस्ता विभिन्न प्रकरणमा जोडिएकाहरूसँग मिलेर देशलाई विदेशीको हातमा लिलाम गर्न खोजेको आरोप लगाएका छन्। देशमा वैदेशिक हस्तक्षेप प्रत्यक्ष महसुस भइरहेको दाबी गर्दै उनले केही पात्रहरू लुकेर बसिरहेको टिप्पणी गरे। बालेनलाई भित्र बसेर मुसुमुसु हाँस्ने तर बाहिर निस्कने साहस नभएको पात्रको रूपमा उनले चित्रण गरेका छन्।
जेनजी (Gen-Z) पुस्ताले सरकारलाई दबाब दिन बोलाउँदा पनि बालेन ननिस्किएको साम्पाङको आरोप छ। बरु भित्रै बसेर विदेशी शक्तिको सेटिङमा मनपरी सरकार बनाउने खेल खेलिएको उनले दाबी गरे। साम्पाङले नयाँ पुस्तालाई उक्साएर आन्दोलनमा भिड्न पठाएको तर आफू भने रमिते बनेको भन्दै आक्रोश पोखेका छन्। उनले प्रश्न गरे, “जेनजीलाई किन उक्साइयो? उनीहरू उक्साएपछि सिंहदरबार किन जलाइयो? यत्रो मानिस मरेपछि र घाइते भएपछि उनीहरूको अन्त्येष्टिमा समेत किन कोही सहभागी भएनन्?”
साम्पाङले फेसबुकमा लगातार स्ट्याटस लेख्दै सिंहदरबार जलाउँछु भन्ने दलालहरूदेखि सावधान रहन चेतावनी दिएका छन्। जनतामा जाने साहस नहुनेले विदेशीको इशारामा प्रधानमन्त्री बन्ने सपना देख्नु देश सिध्याउने खेल भएको उनको टिप्पणी छ। रास्वपा र बालेनको यो समझदारीले राजनीतिक वृत्तमा एउटा ठुलो वैचारिक भिडन्त निम्त्याएको छ। एउटा वैकल्पिक शक्तिले अर्को शक्तिमाथि लगाएको यो गम्भीर आरोपले मतदातालाई अन्योलमा राखेको छ। एकातिर रास्वपा र बालेनको शक्ति एकीकृत हुने प्रयास र अर्कोतिर साम्पाङको कडा अडानले वैकल्पिक शक्तिहरूको भविष्य पेचिलो बनाएको छ।
