हेटौंडा, पुस २० गते । बालमैत्री पालिका हेटौंडाका बालबालिका अझै विद्यालय बाहिर रहेको विषयमा सम्प्रेषण गरिएको समाचारमा प्रयोग गरिएको तथ्याङ्कमा प्राविधिक त्रुटि भएको स्पष्ट गरिएको छ। समाचारमा उल्लेख गरिएको विद्यालय छाड्ने ११ प्रतिशत र परीक्षा नदिने १० प्रतिशतको प्रतिशत तथ्याङ्क भने सही रहेको र ११५ जना विद्यार्थीले पढाइ छाडेको तथा १०५ जना विद्यार्थी परीक्षा नदिने सूचीमा रहेको भन्ने संख्या त्रुटिवश उल्लेख भएको सम्बन्धित पक्षले जानकारी गराएको छ। उक्त त्रुटिप्रति क्षमा प्रार्थना पनि गरिएको छ।
राष्ट्रिय टेलिभिजन हिमालय टेलिभिजनबाट उक्त समाचार प्रसारण भएपछि सामाजिक अभियन्ता तथा सेवा, सहयोग र आवासका अध्यक्ष विशालराज महतले सो विषयमा अध्ययन गरी सामाजिक सञ्जालमार्फत आफ्नो धारणा सार्वजनिक गरेका थिए। उनले निर्णय गर्न सक्ने तहबाटै प्रभावकारी व्यवस्था नहुँदा बालबालिकाको भविष्य जोखिममा पर्ने भन्दै पर्याप्त आधारबिनाको बालमैत्री स्थानीय तहको घोषणा कागजी औपचारिकतामा सीमित भएको टिप्पणी गरेका थिए।
यही सामाजिक सञ्जालमा व्यक्त गरिएको धारणा उद्धृत गर्दै ‘कालिका आधारभूत विद्यालयमा बालबालिका पढाइ छोड्न बाध्य, कागजी बालमैत्री घोषणाप्रति विशालराज महतको कडा आलोचना’ शीर्षकमा रेडियो भरोसाबाट समाचार सार्वजनिक गरिएको थियो।
तर सो समाचारप्रति हेटौंडा उपमहानगरपालिका–१३ का वडाध्यक्ष पेम्बा लामाले आपत्ति जनाएका छन्। रेडियो भरोसासँगको कुराकानीमा उनले कालिका आधारभूत विद्यालयले केही समयअघि आफ्नो वार्षिक उत्सवमा प्रस्तुत गरेको प्रतिवेदन राम्रो रहेको भन्दै त्यही डेटा कसरी त्रुटिपूर्ण रूपमा बाहिर आयो भन्ने विषय गम्भीर रहेको बताए। उनले विद्यालयले पछिल्लो समय शिक्षा क्षेत्रमा सकारात्मक भूमिका खेलेको दाबी गर्दै प्रधानाध्यापक र विद्यालय व्यवस्थापन समितिसँग छलफल गरी वास्तविक अवस्था बुझ्ने जानकारी दिएका छन्।
यसैगरी कालिका आधारभूत विद्यालय व्यवस्थापन समितिकी अध्यक्ष संगीता बल वाइबाले पनि समाचारप्रति आपत्ति जनाएकी छिन्। उनले विद्यालयले दिएको विवरणभन्दा बिल्कुलै फरक ढंगबाट समाचार सम्प्रेषण भएको भन्दै पत्रकारिताको मर्म विपरीत भएको प्रतिक्रिया दिइन्। पहिलो पटक आफ्नो विद्यालयको विषयमा समाचार बनेको उल्लेख गर्दै यसरी गलत बुझाइका आधारमा समाचार आउनु आपत्तिजनक भएको उनको भनाइ छ। उनले सम्बन्धित पत्रकारसँग छलफल गरी तथ्य स्पष्ट पारेर सही ढंगबाट समाचार सार्वजनिक गर्नुपर्ने धारणा राखेकी छिन्।
यता सामाजिक अभियन्ता विशालराज महतले भने हिमालय टेलिभिजनबाट राष्ट्रिय समाचारका रूपमा प्रसारण गरिएको सामग्रीकै आधारमा मात्र आफूले धारणा राखेको स्पष्ट पारेका छन्। टेलिभिजनबाट प्रसारण हुने समाचार सामान्यतः विश्वसनीय हुने बुझाइका आधारमा अध्ययन र अनुभव मिलाएर टिप्पणी गरिएको र कुनै पनि विद्यालयको आन्तरिक तथ्याङ्कलाई लक्षित गरी आलोचना नगरिएको उनको भनाइ छ।
समाचारप्रति उठेका आलोचनापछि उक्त समाचार सम्प्रेषण गर्ने पत्रकार जमुना थिङले पनि सामाजिक सञ्जालमार्फत आफ्नो धारणा सार्वजनिक गरेकी छिन्। यसै सन्दर्भमा रेडियो भरोसा अनलाइनले सम्बन्धित सबै पक्षसँग बुझेर समाचारलाई सन्तुलित बनाउने प्रयास गरेको जनाएको छ।
