हेटौडा, पुस २५ गते । भैरव समूहका संयोजक दिभेष शाक्यले ‘खैरो व्यापार, सुगर कारोबार’ विषयमा सामाजिक सञ्जालमार्फत सार्वजनिक गरेको कविताले अहिले व्यापक चर्चा पाएको छ। उनले कवितामार्फत राज्य प्रणालीभित्र मौलाउँदै गएको दोहोरो चरित्र, शक्ति केन्द्रित शासन र नियमनको कमजोरीमाथि गम्भीर प्रश्न उठाएका छन्।
उनको कवितामा “फलामे ढोकाभित्र कुरा अर्कै, बाहिर अर्कै बोलियो” भन्ने पंक्तिले निर्णय तह र सार्वजनिक अभिव्यक्तिबीचको अन्तर उजागर गरेको छ। नियम–कानुन किताबमै सीमित भई शक्ति र पहुँचका आधारमा चल्ने प्रवृत्तिले आम नागरिक ठगिँदै आएको संकेत कवितामा स्पष्ट देखिन्छ।
त्यस्तै “भित्र खैरो चिनिको कारोबार सहजै गुलियो” भन्ने पंक्तिले सुगर तथा खैरो व्यापारजस्ता अवैध वा अपारदर्शी कारोबारमा शक्तिशाली व्यक्तिहरूको संलग्नता र संरक्षणप्रति संकेत गरेको छ। सबैलाई थाहा हुँदाहुँदै पनि मौनता कायम रहनु नेपाली समाजको विडम्बना भएको उनको सन्देशमा उल्लेख छ।
दिभेष शाक्यले साना नागरिकका लागि ऐन–कानुन कठोर तर ठूला र शक्तिशालीका लागि नजरअन्दाज हुने यथार्थलाई कवितामार्फत उजागर गर्दै सचेत नागरिक आवाज आवश्यक रहेको संकेत गरेका छन्। सामाजिक सञ्जाल प्रयोगकर्ताहरूले उनको कवितालाई वर्तमान राजनीतिक र प्रशासनिक अवस्थाको यथार्थ चित्रण भन्दै समर्थन जनाइरहेका छन्।
