काठमाडौं, पुस २८ गते । काठमाडौंमा दुई दिने थिङ थेमे (परिवार) प्रथम राष्ट्रिय भेला भव्य रूपमा सम्पन्न भएको छ। “एकै कुल, एउटै पहिचान–थिङ थेमे” भन्ने मूल नारासहित आयोजना गरिएको उक्त भेलाले थिङ समुदायको एकता, पहिचान र संगठनात्मक सुदृढीकरणमा महत्वपूर्ण योगदान पुर्याउने अपेक्षा गरिएको छ।
भेलाले नयाँ कार्यसमिति समेत चयन गरेको छ। सर्वसम्मत निर्णयअनुसार मिङमार थिङ अध्यक्षमा चयन भएका छन्। मिङमार थिङको अध्यक्षतामा ५१ सदस्यीय नयाँ कार्यसमिति सर्वसम्मत रूपमा चयन गरिएको हो।
नयाँ कार्यसमितिमा वरिष्ठ उपाध्यक्षमा अमृत थिङ, उपाध्यक्षमा कमलबहादुर थिङ, काजीमान थिङ र शान्ति थिङ चयन भएका छन्। त्यसैगरी महासचिवमा राजकुमार थिङ चयन भएका छन्।
भेलाको अवसरमा थिङ समुदायका विभिन्न क्षेत्रबाट योगदान पुर्याएका कलाकारहरूलाई समेत सम्मान गरिएको थियो। आयोजकका अनुसार यस भेलाले थिङ थेमे परिवारलाई संगठित गर्दै भावी दिनमा सामाजिक, सांस्कृतिक र पहिचान संरक्षणका गतिविधिहरूलाई अझ सशक्त बनाउने विश्वास व्यक्त गरिएको छ।
