हेटौंडा, पुस २९ गते । हेटौंडा–कुलेखानी–काठमाडौं सडक खण्डमा चल्ने केही सवारी चालकले लागूऔषध सेवन गरी सवारी साधन चलाइरहेको गम्भीर तथ्य सार्वजनिक भएको छ। मंगलबार भीमफेदी अस्पतालका चिकित्सक प्रविण पाठकको नेतृत्वमा गरिएको पिसाब परीक्षणमा १ सय ११ जना चालक मध्ये ११ जनाले लागूऔषध सेवन गरेको पुष्टि भएको हो।
जिल्ला ट्राफिक प्रहरी कार्यालय मकवानपुर, इलाका प्रहरी कार्यालय भीमफेदी, जिल्ला जनस्वास्थ्य कार्यालय हेटौंडा र सवारी यान्त्रिक परीक्षण कार्यालय हेटौंडाको संयुक्त अनुगमन तथा चेकजाँचका क्रममा उक्त तथ्य बाहिर आएको हो।
इलाका प्रहरी कार्यालय भीमफेदीका प्रहरी निरीक्षक सन्त श्रेष्ठका अनुसार लागूऔषध सेवन गर्ने ११ जना चालक मध्ये ९ जना सार्वजनिक यातायातका चालक रहेका छन्। तीमध्ये ६ जना सुमो चालक र ३ जना विद्युतीय सवारी (ईभी) चालक हुन्। बाँकी दुई जना फलफूल तथा माछा बोक्ने सवारी साधनका चालक रहेको जनाइएको छ।
पाहाडी तथा जोखिमपूर्ण सडक खण्डमा दुर्घटनाको संख्या बढ्दै गएपछि ट्राफिक प्रहरीको समन्वयमा सवारी साधन र चालकको स्वास्थ्य तथा क्षमता परीक्षणलाई तीव्र बनाइएको हो। गत पुस २० गते भीमफेदी गाउँपालिका वडा नम्बर ६ जुरिखेतमा काठमाडौंबाट हेटौंडातर्फ आउँदै गरेको ना १ ज १७७८ नम्बरको टाटा सुमो दुर्घटना हुँदा ६ यात्रुको मृत्यु र ३ जना गम्भीर घाइते भएका थिए। घाइतेको उपचार अझै जारी रहेको छ।
यात्रुको ज्यान जोखिममा पार्दै लापरबाहीपूर्वक सवारी चलाएको ठहर भएपछि लागूऔषध सेवन गर्ने चालकलाई प्रहरीले नियन्त्रणमा लिएको छ। उनीहरूमाथि कानुनी कारबाही प्रक्रिया अघि बढाउने तयारी भइरहेको जिल्ला ट्राफिक प्रहरी कार्यालय मकवानपुरले जनाएको छ।
