काठमाडौँ, माघ ११ गते । सामाजिक सञ्जालमार्फत बैंक तथा वित्तीय संस्थालाई लक्षित गरी सार्वजनिक नैतिकता र शिष्टाचार विपरीत अभिव्यक्ति दिएको आरोपमा नेपाल प्रहरी प्रधान कार्यालय अन्तर्गत साइबर ब्युरोले एक व्यक्तिमाथि अनुसन्धान अघि बढाएको छ।
साइबर ब्युरोका अनुसार जिल्ला झापा अर्जुनधारा नगरपालिका–११ घर भई हाल नागरिक बचाउ महाअभियान नेपालका ऋणी एसोसिएसनका केन्द्रीय संयोजक रहेका ४४ वर्षीय देवीप्रसाद संग्रौलाले विभिन्न सामाजिक सञ्जाल र ‘अर्थसरोकार’ युट्युब च्यानल मार्फत बैंकका कर्मचारीहरू माथि कुटपिट तथा भण्डारखाल जस्ता घटनालाई उक्साउने खालका अभिव्यक्ति दिएका थिए।
उक्त अभिव्यक्तिले समाजमा भ्रम सिर्जना गरेको भन्दै साइबर ब्युरोले संग्रौलालाई उपस्थित गराई प्रारम्भिक सोधपुछ गरेको जनाएको छ। सोधपुछका क्रममा उनले कानुनको उल्लङ्घन गरी बैंक तथा वित्तीय संस्था विरुद्ध बोलेको स्वीकार गर्दै भविष्यमा कानुनको सम्मान गर्दै जिम्मेवार अभिव्यक्ति दिने प्रतिबद्धता जनाएका छन्। साथै उनले नेपाल सरकारसमक्ष लिखित रूपमा क्षमा याचना समेत गरेका छन्।
साइबर ब्युरोका अनुसार हाल प्रस्तुत घटना सम्बन्धी अनुसन्धान जारी रहेको छ। यसैगरी सामाजिक सञ्जाल तथा अन्य डिजिटल प्लेटफर्म मार्फत कानुन विपरीत अभिव्यक्ति दिने र श्रव्य–दृश्य सामग्री प्रसारण गर्ने गतिविधि माथि ब्युरोको निरन्तर निगरानी रहेको जनाइएको छ। यस्ता गतिविधिमा संलग्नता पुष्टि भए कानुन बमोजिम कारबाही गरिने चेतावनी समेत दिइएको छ।
प्रहरी उपरक्षक दीपकराज अवस्थी, प्रवक्ता तथा सूचना अधिकारीले आम नागरिकलाई सामाजिक सञ्जाल प्रयोग गर्दा जिम्मेवार र कानुनसम्मत हुन अनुरोध गरेका छन्।
