हेटौंडा, माघ १३ गते । हेउँनपा–१६ र १७ मा अवस्थित शिवम सिमेन्ट उद्योगबाट उत्पन्न ध्वनि प्रदूषण, धुलो र धुवाँका कारण स्थानीय बासिन्दा तथा नजिकै रहेको लक्ष्मी आधारभूत विद्यालयमा अध्ययनरत कलिला बालबालिकाको स्वास्थ्यमा प्रत्यक्ष असर परिरहेको भन्दै सामाजिक अभियान्ता तथा सेवा, सहयोग र आवाजका अध्यक्ष विशाल राज महतले कडा आपत्ति जनाएका छन्।
सामाजिक सञ्जालमार्फत सार्वजनिक गरिएको आफ्नो स्टाटसमा अध्यक्ष महतले यस विषयमा आफूहरू चुप नलागेको र निरन्तर खबरदारी गर्दै आएको स्पष्ट पारेका छन्। उनका अनुसार यसअघि शिवम सिमेन्ट उद्योगका प्रतिनिधिसँग दुई पटक छलफल भए पनि पीडित स्थानीय, जनप्रतिनिधि र पत्रकारहरूको उपस्थितिमा लाइभ बार्ता गर्ने सहमति कार्यान्वयन हुन सकेको छैन। हालसम्म पनि छलफलको मिति र औपचारिक जानकारी नआएको उनले बताएका छन्।
महतले उद्योगले राज्य सत्तासमेत आफ्नो अनुकूल बनाउँदै आएको आरोप लगाउँदै हेउँनपा, जिल्ला प्रशासन, सम्बन्धित मन्त्रालय र जनप्रतिनिधिहरूको मौनता माथि प्रश्न उठाएका छन्। “यदि यस्तो होइन भने, समस्याबारे किन कसैले चुइँक्क बोल्दैन ?” उनले स्टाटसमा उल्लेख गरेका छन्।
उनका अनुसार सेवा, सहयोग र आवाजले प्रक्रियागत रूपमा सम्बन्धित निकायमा निरन्तर दबाब दिँदै आएको छ र पूँजीपति वर्गसँगको वर्ग संघर्षमा कुनै सम्झौता नगर्ने अडान कायमै रहनेछ।
आगामी निर्वाचनलाई सन्दर्भ जोड्दै अध्यक्ष महतले हिजो निर्वाचित भएका प्रतिनिधिहरू पुनः उम्मेदवार बनेको र नयाँ उम्मेदवारहरू पनि मैदानमा आएको उल्लेख गर्दै पीडित वडाबासीले सबै उम्मेदवारलाई “समस्याको सम्बोधन किन भएन ?” भनेर प्रश्न गर्नुपर्ने बताए। अब लिखित प्रतिबद्धता नदिने उम्मेदवारलाई भोट नदिने अभियान चलाउनु सबैको साझा जिम्मेवारी भएको उनको भनाइ छ।
अन्त्यमा उनले जनतालाई एकजुट भएर लड्न आह्वान गर्दै सेवा, सहयोग र आवाज सधैं साथ र सहयोगका लागि तयार रहेको प्रतिबद्धता व्यक्त गरेका छन्।
