हेटौंडा, माघ २१ गते । सेवा, सहयोग र आवाज अभियानका अध्यक्ष तथा सामाजिक अभियान्ता विशाल राज महतले चुनावलाई नयाँ–पुरानो पार्टी छुट्याउने प्रतिस्पर्धा नभई नैतिकता र इमान्दारी नाप्ने परीक्षाका रूपमा बुझ्न आग्रह गरेका छन्।
आफ्नो सामाजिक सञ्जालमार्फत स्टाटस सार्वजनिक गर्दै महतले गलत उम्मेदवारलाई समर्थन गर्दा बहादुरी नहुने, बरु आँखा चिम्लेर भीडको पछि लाग्ने प्रवृत्तिले अन्ततः देशमाथि बोझ थपिने बताएका छन्।
उनले भोट माग्ने प्रक्रिया नाटकको संवादजस्तो हुन नहुने उल्लेख गर्दै जनताको भावनासँग खेल्नु विश्वासमाथि गरिएको आघात भएको टिप्पणी गरेका छन्। “आज यही घातलाई राजनीति भनेर सजाइँदैछ,” उनको भनाइ छ।
महतले टोपी, झण्डा र अनुहार फेरिए पनि धेरै उम्मेदवारको नियत नफेरिने यथार्थ औँल्याउँदै मतदातालाई नारा होइन नियत, भाषण होइन व्यवहार र अनुहार होइन इतिहास हेरेर मतदान गर्न आग्रह गरेका छन्।
एक गलत निर्णयको सजाय उम्मेदवारले होइन, सिंगो देशले भोग्नुपर्ने भन्दै उनले सार्वभौमसत्ता पनि निरन्तर गलत चुनावी निर्णयकै यात्राबाट क्रमशः कमजोर हुँदै जाने चेतावनी दिएका छन्।
अन्त्यमा, उनले लहलहैमा होइन विवेकमा, भावनामा होइन जिम्मेवारीमा उभिएर मतदान गर्न आग्रह गर्दै सानो देखिने भोटले राष्ट्रकै भविष्य निर्धारण गर्ने स्मरण गराएका छन्।
