लमजुङ, साउन १० गते । आज राति ११:१४ बजेदेखि गएको तीन घण्टाको अवधिमा लमजुङको घरेढुङ्गा क्षेत्रमा ९५.२ मिलिमिटर वर्षा मापन भएको छ। मौसम पूर्वानुमान शाखाका अनुसार उक्त क्षेत्रमा अझै थप वर्षा हुने सम्भावना रहेकाले स्थानीय बासिन्दा तथा नदी–खोला आसपासका क्षेत्रमा बसोबास गर्ने नागरिकलाई आवश्यक सतर्कता अपनाउन आग्रह गरिएको छ।
शाखाले जारी गरेको पछिल्लो जानकारीअनुसार हाल कोशी, बागमती र गण्डकी प्रदेशका केही स्थानमा तथा मधेश, लुम्बिनी र कर्णाली प्रदेशका धेरै स्थानहरूमा हल्कादेखि मध्यम वर्षा भइरहेको छ। वर्षा निरन्तर रहने सम्भावना रहेकाले पहाडी तथा हिमाली क्षेत्रमा पहिरो र भूक्षय तथा नदी–खोलामा पानीको बहाव बढ्न सक्ने जोखिम रहेको मौसमविद्ले बताएका छन्।
यस्तै, वर्षाका कारण सडक यात्रा प्रभावित हुन सक्ने भएकाले यात्रा गर्दा विशेष सावधानी अपनाउन, मौसमको अद्यावधिक जानकारी पछ्याउन तथा जोखिमयुक्त क्षेत्रबाट आवश्यक सतर्कता अपनाउन मौसम पूर्वानुमान शाखाले अनुरोध गरेको छ।
