काठमाडौँ, फागुन ६ गते । नेपालकै पहिलो पब्लिक लिमिटेड ट्राभल कम्पनी गुरु ट्राभल्स लिमिटेड र सूचना तथा सञ्चार प्रविधि क्षेत्रमा स्थापित इन्टरनेट सेवा प्रदायक क्लासिक टेक प्रा.लि. बीच व्यवसायिक सहकार्यका लागि समझदारीपत्र (MOU) मा हस्ताक्षर सम्पन्न भएको छ।
समझदारीपत्रमा क्लासिक टेक प्रा.लि.का चिफ बिजनेस डेभलपमेन्ट अफिसर रोब्जत भट्टराई र गुरु ट्राभल्स लिमिटेडका चिफ अपरेटिङ अफिसर (COO) अनिल धरेलले हस्ताक्षर गरेका हुन्। उक्त समझदारी आज आयोजित विशेष कार्यक्रममा सार्वजनिक गरिएको हो। सम्झौताअनुसार दुवै संस्थाका कर्मचारी तथा सरोकारवालाहरूले विशेष छुट र सुविधा पाउने व्यवस्था गरिएको छ।
यसअन्तर्गत गुरु ट्राभल्सले क्लासिक टेकका कर्मचारी तथा सरोकारवालालाई अन्तर्राष्ट्रिय ट्राभल प्याकेजमा अधिकतम रु. १०,००० सम्म छुट, डोमेस्टिक ट्राभल प्याकेजमा २.५ प्रतिशत छुट तथा डोमेस्टिक हवाई यातायात सेवामा प्रति टिकट रु. ५० नगद छुट प्रदान गर्नेछ। त्यसैगरी क्लासिक टेकले गुरु ट्राभल्सका कर्मचारी तथा सरोकारवालालाई इन्टरनेट प्याकेज, कर्पोरेट कम्युनिकेशन सेवा तथा अन्य डिजिटल समाधानहरूमा १५ प्रतिशत छुट उपलब्ध गराउनेछ (कर तथा सेवा शुल्क बाहेक)। साथै दुवै संस्थाले सामाजिक उत्तरदायित्व (CSR) अन्तर्गत सञ्चालन हुने विभिन्न कार्यक्रम तथा गतिविधिमा आपसी सहकार्य गर्ने सहमति जनाएका छन्।
कार्यक्रममा बोल्दै क्लासिक टेकका चिफ बिजनेस डेभलपमेन्ट अफिसर रोब्जत भट्टराईले गुरु ट्राभल्ससँगको सहकार्यले प्रविधिमैत्री सेवा विस्तारमा टेवा पुग्ने र छिटो, भरपर्दो तथा गुणस्तरीय इन्टरनेट सेवामार्फत डिजिटल प्रवर्द्धन र पर्यटन क्षेत्रको विकासमा सकारात्मक योगदान पुग्ने विश्वास व्यक्त गरे।
त्यस्तै गुरु ट्राभल्सका COO अनिल धरेलले यस समझदारीले कम्पनीका सेवा तथा डिजिटल प्लेटफर्मलाई थप प्रभावकारी बनाउने, अनलाइन बुकिङ र डिजिटल सेवामा सहज पहुँच बढाउने तथा क्लासिक टेकको भरपर्दो इन्टरनेट सेवामार्फत ट्राभल व्यवसायलाई अझ प्रविधिमैत्री बनाउने बताए। उनका अनुसार यस सहकार्यले पर्यटन क्षेत्रको डिजिटल प्रवर्द्धनमा महत्वपूर्ण भूमिका खेल्नेछ।
