हेटौँडा,बैशाख १४ गते । हेटौडा उपमहानगरपालिका–४ का वडाध्यक्ष तथा नेकपा एमाले केन्द्रीय लेखा आयोगका सदस्य नवीन सिग्देलले पछिल्लो समय विकास निर्माण र जनअपेक्षाबारे सामाजिक सञ्जालमार्फत धारणा सार्वजनिक गरेका छन्। उनले जनप्रतिनिधिलाई विकासका विषयमा गरिने आलोचना र व्यङ्ग्यप्रति असन्तुष्टि जनाउँदै वास्तविकता बुझ्न आग्रह गरेका छन्।
सिग्देलले विकास कार्य केवल भाषण र आलोचनाले मात्र सम्भव नहुने उल्लेख गर्दै वर्तमान परिस्थितिले जनप्रतिनिधिलाई विभिन्न चुनौतीहरूबीच काम गर्न बाध्य बनाएको बताए। उनले कतिपयले विकासलाई जनप्रतिनिधिको व्यक्तिगत खर्चबाट भएको जस्तो टिप्पणी गर्ने गरेकोप्रति आपत्ति जनाउँदै विकास राज्यको कोष र जनताले तिरेको करबाट हुने भए पनि त्यसका लागि जनप्रतिनिधिको पहल, प्रयास र निरन्तर सक्रियता अत्यावश्यक हुने स्पष्ट पारे।
उनले हालै वडा कार्यालयमा आएको एक सेवाग्राहीसँगको अनुभव साझा गर्दै सडक निर्माणका विषयमा उत्पन्न विवाद उल्लेख गरे। सेवाग्राहीले आफ्नो घरअगाडिको बाटो तत्काल निर्माण हुनुपर्ने माग राखेपछि सिग्देलले प्राथमिकताका आधारमा काम भइरहेको र आफ्नो कार्यकालमै उक्त काम सम्पन्न गर्ने प्रयास भइरहेको बताएका थिए। तर सेवाग्राहीले “विकास नियमित प्रक्रिया हो, कसैको खल्तीको पैसाले बनेको होइन, हाम्रो करबाट बनेको हो” भन्दै असन्तुष्टि व्यक्त गरेका थिए।
यस प्रसङ्गलाई उठाउँदै सिग्देलले विगतमा भएका विकास कार्यहरू—ढुवान नियन्त्रण, सडक सुधार तथा बाढीबाट प्रभावित क्षेत्रको संरक्षण—आफ्नो पहल र निरन्तर प्रयासकै कारण सम्भव भएको दाबी गरे। उनले यस्ता कामहरू नियमित प्रक्रियाले मात्र नभई सक्रिय नेतृत्व र प्रतिबद्धताबाट सम्भव भएको जिकिर गरे।
साथै, उनले हालको राजनीतिक परिवेशप्रति व्यङ्ग्य गर्दै केही धनी व्यक्तिहरू चुनाव जितेर आएको र उनीहरूले जनताको अपेक्षाअनुसार विकास गर्नुपर्ने बताएका छन्। “हामीलाई जसले गरे पनि जसरी गरे पनि विकास चाहिएको हो,” भन्दै उनले जनअपेक्षा पूरा हुनु नै मुख्य उद्देश्य भएको बताए।
वडाध्यक्ष सिग्देलले स्थानीय सरकार सञ्चालनका क्रममा आगलागी, पूर्वाधार क्षति लगायतका कठिन अवस्थाबीच पनि आफूहरू सेवामा निरन्तर खटिरहेको उल्लेख गर्दै जनताको विश्वास कायम राख्न प्रतिबद्ध रहेको बताएका छन्। “न चुक्नु, न झुक्नु” भन्ने सन्देश दिँदै उनले जनसेवामा निरन्तर लागिरहने प्रतिवद्धता व्यक्त गरेका छन्।
