काठमाडौं,बैशाख १७ गते । स्वास्थ्य तथा जनसङ्ख्या मन्त्रालयले लगातार तीन दिन सार्वजनिक बिदा परेकाले स्वास्थ्य सेवा प्रभावित हुन सक्ने अवस्थालाई ध्यानमा राख्दै वैशाख १८ गते देशभरका सरकारी अस्पतालमा ओपिडी (बहिरङ्ग) सेवा सञ्चालन गर्न निर्देशन दिएको छ।
मन्त्रालयका अनुसार वैशाख १८, १९ र २० गते लगातार सार्वजनिक बिदा परेकाले सरकारी अस्पतालहरूमा नियमित ओपिडी सेवा प्रभावित हुने सम्भावना रहेको छ। यसबाट सेवाग्राहीलाई स्वास्थ्य सेवा लिन असुविधा हुन सक्ने देखिएकाले यस्तो निर्णय गरिएको हो।
सेवाग्राहीलाई सहज रूपमा स्वास्थ्य सेवा उपलब्ध गराउने उद्देश्यले वैशाख १८ गते देशभरका सबै सरकारी अस्पतालहरूमा ओपिडी सेवा सञ्चालन गर्न सम्बन्धित अस्पताल प्रशासनलाई अनुरोध गरिएको मन्त्रालयले जनाएको छ।
मन्त्रालयका सह-प्रवक्ता डाक्टर समीकुमार अधिकारीले जारी गरेको प्रेस विज्ञप्तिमा आकस्मिक अवस्थाका बिरामीहरूका साथै नियमित जाँच तथा परामर्शका लागि आउने सेवाग्राहीलाई लक्षित गर्दै उक्त व्यवस्था गरिएको उल्लेख गरिएको छ।
