हेटौडा,जेठ १ गते । हेटौंडा उपमहानगरपालिका–४ मा सडक तथा ढल व्यवस्थापनलाई प्राथमिकतामा राख्दै वडालाई कच्ची सडक, खाल्टाखुल्टी र ढुवानमुक्त बनाउने अभियान अघि बढाइएको छ । वडाध्यक्ष नवीन सिग्देलले सामाजिक सञ्जाल फेसबुक मार्फत जानकारी दिँदै २०८४ सालसम्म वडालाई व्यवस्थित र स्तरीय पूर्वाधारयुक्त क्षेत्र बनाउने लक्ष्यसहित विभिन्न योजना अघि बढाइएको बताएका छन् ।
उनले “काम गर्नेलाई नै आलोचना हुन्छ, झटारो पनि फलेकै बृक्षमा हानिन्छ” भन्दै विकास निर्माणका कामलाई निरन्तरता दिइने उल्लेख गरेका छन् ।
वडाध्यक्ष सिग्देलका अनुसार विभिन्न सडक स्तरीकरण तथा ढल निर्माण योजनाका लागि बोलपत्र आह्वान गरिएको छ । जसअन्तर्गत सूर्यचोक–कर्राचोक (पृथ्वीपथ) क्षेत्रमा ढल तथा सडक निर्माण, सृजना टोलमा ढल निर्माण, प्रजातान्त्रिकपथ (कालिका मन्दिर–भुवनेश्वरपथ) मा कर्भस्टोन तथा ढल निर्माण, मितेरीचोक क्षेत्रमा ढल, कर्भस्टोन र स्लोप ड्रेन निर्माणका योजना समावेश छन् ।
त्यस्तै पानी ट्याङ्कीदेखि पशुपति मन्दिर रोडसम्म, मित्रनगरका केही स्थान तथा अजरअम्बर रोड मर्मत तथा कालोपत्रेका लागि समेत बोलपत्र प्रक्रिया अघि बढाइएको जनाइएको छ ।
हाल वडाभित्र गिरीटोल भित्री सडक स्तरीकरण गरी ढुवानमुक्त बनाउने काम, गर्दोही भित्री सडक सुधार, अजरअम्बर रोडमा पेटी निर्माण तथा विभिन्न स्थानमा सडक र पेटी मर्मतको काम जारी रहेको वडाध्यक्ष सिग्देलले बताएका छन् ।
स्थानीय तहको विकासलाई तीव्र बनाउने उद्देश्यसहित सडक, ढल र पैदलमार्ग व्यवस्थापनलाई प्राथमिकतामा राखिएको उनको भनाइ छ ।
