काठमाडौं,जेठ १ गते । वैदेशिक रोजगार विभागले वैदेशिक रोजगारीमा जाने सेवाग्राहीहरूको सहजताका लागि वैदेशिक रोजगार सूचना व्यवस्थापन प्रणाली (FEIMS) मा नयाँ सुविधा थप गरेको जनाएको छ। विभागका अनुसार श्रम स्वीकृतिका लागि अनलाइन आवेदन दिने क्रममा धेरै सेवाग्राहीले आफ्नो पासपोर्ट विवरण बिर्सिएर प्रोफाइलमा लगइन गर्न समस्या भोग्दै आएका थिए।
उक्त गुनासोलाई सम्बोधन गर्दै अब सेवाग्राही स्वयंले आफ्नो जन्ममिति (Date of Birth) र राहदानी जारी मिति (Passport Issue Date) प्रयोग गरी “Passport Reset” गर्न सक्ने व्यवस्था गरिएको विभागले जनाएको छ।
त्यस्तै, सेवाग्राहीहरूको सुविधालाई ध्यानमा राख्दै गन्तव्य मुलुकको कम्पनीको नाम समेत आफैंले प्रणालीमा थप (Company Adding) गर्न सक्ने सुविधा उपलब्ध गराइएको छ। विभागले कम्पनीको नाम थप गर्दा वैदेशिक रोजगारीसँग सम्बन्धित आधिकारिक कागजातमा उल्लेख भएको कम्पनीको नाम मात्र प्रयोग गर्न अनुरोध गरेको छ।
विभागले आफ्नो प्रोफाइल सुरक्षित राख्न राहदानी (Passport) को फोटो अन्य व्यक्तिलाई उपलब्ध नगराउन समेत आग्रह गरेको छ। साथै प्रणालीको दुरुपयोग हुन नदिन व्यक्तिगत विवरण गोप्य राख्न सेवाग्राहीलाई सचेत गराइएको छ।
FEIMS प्रणालीमार्फत वैदेशिक रोजगारीमा जाने नेपाली नागरिकहरूले श्रम स्वीकृतिसम्बन्धी सेवा अनलाइनबाट प्राप्त गर्दै आएका छन्।
