वीरगंज,जेठ ४ गते। मेडिकल व्यवसायी तथा ‘राष्ट्र, राष्ट्रियता, धर्म, संस्कृति र नागरिक बचाउ महाअभियान नेपाल’का संयोजक दुर्गा प्रसाई लाई प्रहरीले वीरगंजबाट पक्राउ गरेको छ।
प्रहरी स्रोतका अनुसार प्रसाईलाई वीरगंजस्थित दियालो होटलबाट मंगलबार पक्राउ गरिएको हो। उनलाई “माथिको आदेश” भन्दै नियन्त्रणमा लिइएको बताइएको छ। यद्यपि, कुन आरोप वा कसुरमा पक्राउ गरिएको हो भन्ने विषयमा आधिकारिक जानकारी भने सार्वजनिक गरिएको छैन।
प्रसाई सोमबार सिमरा विमानस्थल हुँदै वीरगंज पुगेका थिए। वीरगंजमा आयोजना हुने कार्यक्रममा सहभागी हुन उनी त्यहाँ पुगेका हुन्। कार्यक्रममा सहभागी हुनुअघि उनले विमानस्थलमै सञ्चारकर्मीसँग कुराकानी गर्दै वर्तमान सरकार र राष्ट्रिय प्रजातन्त्र पार्टी (राप्रपा) का सांसदहरूमाथि आलोचनात्मक टिप्पणी गरेका थिए।
प्रहरीले पक्राउबारे पुष्टि गरे पनि विस्तृत विवरण आउन बाँकी रहेको जनाएको छ। घटनापछि प्रसाई समर्थकमाझ चासो र चर्चा बढेको छ।
