हेटौंडा, भदौ १७ गते । अब नेपालमा पनि फेसबुक मोनेटाइजेशन सुविधा लागू भएको छ। यसअघि ‘Stars’ र ‘In-stream ads for Live’ जस्ता केही सिमित सुविधामात्र उपलब्ध भए पनि अब धेरैजसो क्रिएटरहरूका लागि थप विकल्पहरू खुल्न थालेका छन्।
फेसबुकबाट कमाई गर्नका लागि प्रयोगकर्ताले निश्चित मापदण्ड पूरा गर्नुपर्ने हुन्छ। तीमध्ये प्रमुख शर्तहरूमा व्यक्तिगत प्रोफाइलमा ‘Professional Mode’ अन गरिएको वा पेज प्रयोग गरिएको हुनुपर्नेछ। साथै, पेज वा प्रोफाइलमा आवश्यक संख्यामा फलोअर, पर्याप्त वाचटाइम, कम्तीमा पाँच सक्रिय भिडियो र फेसबुकको नीतिहरूको पालना अनिवार्य छ।
विशेषगरी, ‘In-stream ads’ को लागि पछिल्ला ६० दिनमा कम्तीमा ६०,००० मिनेट भिडियो हेरिएको हुनुपर्ने र प्रयोगकर्ताको उमेर १८ वर्ष पूरा भएको हुनुपर्ने शर्त राखिएको छ।
यी सबै मापदण्ड पूरा गरेपछि प्रयोगकर्ताले ‘फेसबुक क्रिएटर स्टुडियो’ मार्फत आफ्नो योग्यता जाँच गरी मोनेटाइजेशनका लागि आवेदन दिन सक्नेछन्।
नेपालमा यो सुविधा सुरु हुनु डिजिटल क्रिएटरहरूका लागि नयाँ अवसरका रूपमा आएको छ। यसले उनीहरूलाई आफ्नै सामग्रीमार्फत आम्दानी गर्ने मात्र नभई डिजिटल अर्थतन्त्रलाई समेत सुदृढ बनाउन सहयोग गर्ने बताइएको छ।
