काठमाडौं, अशोज २७ गते । विवेकशील साझा पार्टीका पूर्व अध्यक्ष रविन्द्र मिश्रले सिंहदरबार लगायतका सरकारी भवनहरूमा भएको आगजनी सम्बन्धी घटनाबारे सामाजिक सञ्जालमार्फत आफ्नो धारणा सार्वजनिक गरेका छन्। उनले उक्त घटनालाई इतिहासकै कालो र हृदयविदारक दिनको संज्ञा दिँदै नेपाली सेनाको निर्णयलाई विवेकपूर्ण करार दिएका छन्।
मिश्रले लेखेका छन्,
“सिंहदरबार लगायत कयौँ भवनहरू जसरी दनदनी बले, त्यो केवल जन-आक्रोशको परिणाम थिएन भन्ने न्यूयोर्क टाइम्सको रिपोर्टपछि लगभग प्रष्ट भएको छ। सेनाले किन सिंहदरबार बचाउन सकेन भनेर उठिरहेका प्रश्नबारे एउटा कुरा भन्न चाहन्छु — यदि नेपाली सेनाले सिंहदरबार बचाउन Warning Shot मात्र नहानेर साँच्चिकै गोली चलाएको भए कम्तिमा केही दर्जनको ज्यान जाने थियो।”
उनले थप लेखेका छन्,
“त्यसपछि अहिले सेनाले किन सिंहदरबार बचाउन सकेन भनेर प्रश्न गर्नेहरूले नै ‘सेनाले किन गोली चलायो?’, ‘हत्यारा सेनालाई कारबाही गर’ भन्ने थिए। त्यसैले सेनाले भौतिक संरचना जोगाउनका लागि मानवीय क्षति हुन नदिनु विवेकपूर्ण निर्णय हो।”
मिश्रका अनुसार नेपाली राष्ट्रियताका तीन प्रमुख खम्बा — सिंहदरबार (कार्यपालिका), संसद (व्यवस्थापिका) र सर्वोच्च अदालत (न्यायपालिका) मा आगो लगाइनु देशकै दुर्भाग्यपूर्ण र दुखद क्षण हो।
