हेटौँडा, मंसिर २१ गते । हेटौडा उपमहानगरभित्र पर्ने राष्ट्रिय लोकमार्गहरूको सडक सीमा संरक्षण अभियान सर्वोच्च अदालतको उत्प्रेषण आदेशपछि स्थगित भएको छ।
गएको मंसिर ५ गते सडक डिभिजन कार्यालय हेटौंडाले गोरखापत्र दैनिकमार्फत जारी गरेको सूचनामा २५–२५ गज भित्रका संरचना हटाउने, बजार क्षेत्रमा राजमार्गको दायाँबायाँ सडक खाली गराउने लगायतका कार्यका लागि सर्वसाधारण, घरधनी, व्यवसायी, सञ्चारकर्मी तथा सरोकारवालाहरूलाई सहयोगको आह्वान गरिएको थियो।
निर्धारित अवधिभित्र सो अभियानमा सकारात्मक साथ र सहयोग प्रदान गर्ने सबैप्रति डिभिजन कार्यालयले आभार व्यक्त गरेको छ। यद्यपि सूचनाविरुद्ध केही सरोकारवालाहरूले सर्वोच्च अदालतमा रिट निवेदन दर्ता गरेपछि अदालतले मंसिर १९ गते उत्प्रेषण आदेश जारी गरेको र सो आदेश मंसिर २१ गते बिहान १२:४६ बजे तामिल भएको डिभिजन कार्यालयले जनाएको छ।
अदालतको आदेशलाई सम्मान गर्दै सडक डिभिजन हेटौंडाले सूचना अनुसारका सबै काम हालका लागि स्थगन गरिएको जानकारी दिएको छ।
डिभिजन प्रमुखका अनुसार अदालतको आगामी निर्णयअनुसार मात्र अगाडिका कार्यबारे सहमति निर्माण गरिनेछ।
