हेटौडा, पुस २५ गते । हेटौंडा उपमहानगरपालिकाकी मेयरले मृत्युको मुखमा पुगेर बाँच्न सफल एक अनाथ शिशुलाई काखमा लिएको तस्बिर सामाजिक सञ्जालमा व्यापक रूपमा प्रशंसा भइरहेको बेला, सेवा सहयोग र आवाजमा हामीका अध्यक्ष तथा सामाजिक अभियन्ता विशाल राज महतले सो तस्बिरप्रति सम्मान जनाउँदै नेतृत्वको दायित्वबारे गम्भीर प्रश्न उठाएका छन्।
सामाजिक सञ्जालमा सार्वजनिक स्टाटसमार्फत उनले उक्त कार्यलाई मानवीय र प्रशंसनीय भनेका छन्। तस्बिरमा जनप्रतिनिधिको जिम्मेवारीसँगै एक आमाको ममतामय भावना झल्किएको भन्दै मेयर धन्यवादको पात्र भएको उल्लेख गरेका छन्। तर उनले नेतृत्व केवल भावनात्मक तस्बिर र क्षणिक संवेदनामा सीमित हुन नहुने स्पष्ट पारेका छन्।
अभियन्ता महतले हेटौंडा उपमहानगरका हजारौँ बालबालिका, गर्भवती महिला र आमजनताको अभिभावकत्व ग्रहण गर्नु नै मेयरको वास्तविक जिम्मेवारी भएको उल्लेख गर्दै डम्पिङ साइडमा हरेक वर्ष लाग्ने आगोबाट निस्कने विषालु ग्यासयुक्त धुवाँले जनस्वास्थ्यमा दीर्घकालीन असर पारिरहँदा समेत मौनता देखिनु दुःखद भएको बताएका छन्।
त्यसैगरी हेटौंडा–१७ स्थित सिवम् सिमेन्ट उद्योगबाट निस्कने PM2.5 र PM10 धुलोका कारण २५० भन्दा बढी बालबालिका र सिङ्गो गाउँ नै स्वास्थ्य जोखिममा परेको तथा विस्थापनको अवस्थामा पुगेको विषयमा समेत स्थानीय तहको सक्रियता नदेखिएकोप्रति उनले गुनासो गरेका छन्।
नगरभित्रका विद्यालयमा नाङ्गो खुट्टा, च्यातिएको लुगा, झोला बिना पढ्न बाध्य बालबालिका र अभावकै कारण विद्यालय छोड्नुपरेका विद्यार्थीप्रति संवेदनशीलता नदेखिनु नेतृत्वका लागि गम्भीर प्रश्न भएको महतको भनाइ छ।
जनताले आशा, भरोसा र विश्वासका साथ दिएको मतको कदर गर्दै जनताको पक्षमा उभिनु मेयरको दायित्व भएको उल्लेख गर्दै उनले ध्यानाकर्षण गराउँदा विरोधको अनुभूति हुनु र जवाफमा लाचारपन देखिनु दुर्भाग्यपूर्ण भएको बताएका छन्।
महिला मेयर पाएको अवसरलाई इतिहास बनाउन प्रयोग गर्नुपर्नेमा जोड दिँदै उनले महिला सक्षम, संवेदनशील र निर्णायक नेतृत्व दिन सक्छन् भन्ने प्रमाणित गर्ने समय यही भएको उल्लेख गरेका छन्। अन्त्यमा उनले “यो विरोध होइन, कर्तव्यबोधको अनुरोध हो” भन्दै समय अझै बाँकी रहेको र शुभकामना व्यक्त गरेका छन्।
