काठमाडौँ,चैत २५ गते । पूर्व प्रधानमन्त्री तथा नेपाली कांग्रेसका निवर्तमान सभापति शेरबहादुर देउवाले आफू र आफ्नो परिवारमाथि सम्पत्ति शुद्धिकरण सम्बन्धी अनुसन्धान सुरु गरिएको विषयमा सार्वजनिक प्रतिक्रिया जनाएका छन्। उनले सामाजिक सञ्जाल फेसबुकमार्फत धारणा सार्वजनिक गर्दै सञ्चारमाध्यममा आएका केही विवरण भ्रामक र झुटा रहेको दाबी गरेका हुन्।
देउवाले आफ्नो वक्तव्यमा आफू र आफ्नो परिवारको सम्पत्ति सम्बन्धी विषयमा फैलाइएको प्रचार बाजी सत्य नभएको उल्लेख गरेका छन्। उनले नेपालको प्रचलित कानुनअनुसार सार्वजनिक पदमा रहँदा सम्पत्तिको यथार्थ विवरण सम्बन्धित सरकारी निकायमा पेश गरिएको स्पष्ट पारे।
उनले आफ्नो राजनीतिक जीवन लोकतान्त्रिक शासन व्यवस्था, विधिको शासन, स्वतन्त्र न्यायपालिका तथा पारदर्शिताको पक्षमा समर्पित रहेको उल्लेख गर्दै राज्यका सबै अंग स्वतन्त्र र सक्षम हुनुपर्ने मान्यता आफूले सधैं बोकेको बताए। साथै, आफ्नो जीवनलाई ‘खुला पुस्तक’ का रूपमा चित्रण गर्दै समयक्रमसँगै वास्तविकता स्पष्ट हुँदै जाने विश्वास व्यक्त गरे।
भ्रष्टाचार नियन्त्रण र सुशासन प्रवर्द्धनमा आफ्नो योगदान स्मरण गराउँदै देउवाले आफू गृहमन्त्री हुँदा २०४८ सालमा अख्तियार दुरुपयोग अनुसन्धान आयोग ऐन र प्रधानमन्त्री हुँदा २०५९ सालमा भ्रष्टाचार निवारण ऐन लागू भएको विषय सर्वविदित रहेको बताए।
त्यस्तै, उनले हाल स्वास्थ्य उपचारका लागि विदेशमा रहेको र उपचारको प्रक्रिया जारी रहेको जानकारी पनि दिएका छन्। अन्त्यमा उनले अतिरञ्जित र अपुष्ट विवरणका आधारमा भ्रमित नहुन सबैमा आग्रह गरेका छन्।
