काभ्रेपलाञ्चोक,बैशाख २१ गते । अविरल वर्षाका कारण काभ्रेपलाञ्चोक जिल्लाका विभिन्न स्थानहरूमा जोखिम बढेपछि बीपी राजमार्गमा सवारी आवागमन पूर्ण रूपमा बन्द गरिएको छ। जिल्ला प्रहरी कार्यालय, काभ्रेपलाञ्चोकले सोमबार दिउँसो ४:१५ बजे अत्यन्त जरुरी सूचना जारी गर्दै तत्कालका लागि राजमार्ग बन्द गरिएको जानकारी दिएको हो।
प्रतिकूल मौसमका कारण जिल्लाभर अत्यधिक पानी परिरहेको र यसले सडकमा पहिरो, ढलान तथा अन्य अवरोधको जोखिम बढाएको भन्दै सुरक्षाको दृष्टिले सवारी सञ्चालन रोकिएको प्रहरीले जनाएको छ। सम्भावित दुर्घटना तथा जनधनको क्षति रोक्नका लागि यो निर्णय लिइएको उल्लेख गरिएको छ।
प्रहरीका अनुसार मौसममा सुधार आई सडक सुरक्षित भएको पुष्टि भएपछि मात्रै राजमार्ग पुनः सञ्चालन गरिनेछ। त्यसका लागि जिल्ला प्रहरी कार्यालयले अर्को सूचना जारी गरी यात्रु तथा सवारी चालकलाई जानकारी गराउनेछ।
यसबीच, यात्रु तथा सवारी चालकलाई वैकल्पिक मार्ग प्रयोग गर्न र अनावश्यक यात्रा नगर्न आग्रह गरिएको छ। थप जानकारी तथा आपतकालीन सहयोगका लागि १०० र १०३ नम्बरमा सम्पर्क गर्न सकिने पनि प्रहरीले जनाएको छ।
