हेटौंडा,जेठ १४ गते। हेटौंडा उपमहानगरपालिका–११ मा एक दिने न्यायिक सचेतना कार्यक्रम सम्पन्न भएको छ । न्यायिक समिति हेटौंडा–११ को आयोजना तथा वडा कार्यालयको आर्थिक सहयोगमा कार्यक्रम सम्पन्न भएको हो ।
कार्यक्रम न्यायिक समिति हेटौंडा–११ की संयोजक शर्मिला अधिकारीको सभाध्यक्षता तथा वडा अध्यक्ष जुना दाहालको प्रमुख आतिथ्यतामा आयोजना गरिएको थियो । स्थानीय तहमा रहेका न्यायिक समितिको भूमिका, कानुनी अधिकार तथा समुदायस्तरमा देखिने विभिन्न विवाद र हिंसाका विषयमा नागरिकलाई सचेत गराउने उद्देश्यले कार्यक्रम सञ्चालन गरिएको आयोजकले जनाएको छ ।
कार्यक्रममा स्थानीय तहमा हुने पारिवारिक विवाद, घरेलु हिंसा, अन्याय, सामाजिक विभेद तथा विभिन्न प्रकारका कुरिती विरुद्ध कसरी कानुनी रूपमा समाधान खोज्न सकिन्छ भन्ने विषयमा सहजीकरण गरिएको थियो ।
हेटौंडा उपमहानगरपालिकाको कानुन शाखा प्रमुख लक्ष्मण मैनाली तथा अधिवक्ता सुजन तिमल्सिनाले न्यायिक निरुपण, मेलमिलाप प्रक्रिया तथा स्थानीय तहको न्यायिक समितिको अधिकार क्षेत्रबारे प्रशिक्षण दिएका थिए ।
कार्यक्रममा वडा सदस्यद्वय गोपिनी सापकोटा र गीता सुनार, सहायक वडा सचिव जीवन ढुङ्गेल, २३ वटै टोल विकास संस्थाका अध्यक्ष तथा प्रतिनिधि, विद्यालय, खानेपानी, वन, सहकारी संस्था, नेपाल रेडक्रस, परिवार नियोजन संघ, बाल क्लब, सिविन बाल हेल्पलाइन तथा बाल सञ्जालका प्रतिनिधिहरुको सहभागिता रहेको थियो ।
कार्यक्रममा सहभागीहरूले यस्ता सचेतना मूलक कार्यक्रमले समुदायमा न्यायप्रतिको पहुँच बढाउनुका साथै सामाजिक समस्या समाधानमा सहयोग पुग्ने विश्वास व्यक्त गरेका थिए ।
