मनहरी । मनहरी-२,भुन्द्रुङटाँडिमा रहेको श्री सीता माध्यमिक विद्यालयमा निशुल्क भर्ना सुरु हुने भएको छ । विद्यालय परिवारबाट सन्चालन गरेको घरदैलो अभियान मार्फत आइतबारदेखि निशुल्क भर्ना सुरु हुने जानकारी गराइएको हो ।
व्यवस्थापन समिती र प्राध्यापकहरु सहितको विद्यालय परिवारले शुक्रबार र शनिबार दुईदिने घरदैलो अभियान सन्चालन गरेको छ । अभियानको क्रममा मनहरी-२ का प्रत्येक गाउँघरमा पुगि वैशाख २१ गते आइतबारदेखि २३ गते मंगलबारसम्म निशुल्क भर्ना अभियान सन्चालन गर्ने जानकारी दिएको छ । भर्ना अभियान सकिए लगत्तै वैशाख २४ गते बुधबारदेखि कक्षा सन्चालन हुने बताइएको छ ।
गतवर्षदेखि निशुल्क भर्ना सन्चालन गरेको सीता माविले यस वर्षदेखि कक्षा १ देखि कक्षा ३ सम्म अंग्रेजी माध्यमबाट अध्यापन गराइने भएको छ । पछिल्लो समयमा भएको कमजोर पढाइ उपलब्धि सम्बन्धि गहिरो समिक्षा गर्दै यस वर्षदेखी गुणस्तरीय शिक्षा प्रदान गर्ने प्रतिबद्धता सहित विद्यालय परिवार अघि बढेको विद्यालय व्यवस्थापन समितिका अध्यक्ष राजकुमार थिङ्ले बताएका छन् ।
सुरुवाती वर्षहरुमा एसईईमा गाउँपालिका टप हुने विद्यालय एक्कासि कमजोर भएको हुँदा सबैको टाउको दुखाइको विषय बनेको थियो ।यसपालीबाट कक्षा १ देखि ३ सम्म अंग्रेजी माध्यमबाट पढाइ सन्चालन गर्न खोजेको सीता माविले फेरि आफ्नो पुरानो इतिहास भेटाउने लक्ष्य लिएको विद्यालयका प्रधानाध्यापक विशाल घलानले जानकारी दिएका छन् ।
साथै पर्याप्त मात्रमा भौतिक पूर्वाधार भएको विद्यालयमा शान्त र बालमैत्री वातावरणमा पढाइ सन्चालन गर्ने भएको छ । दक्ष तथा अनुभवी शिक्षकहरुबाट शिक्षण सिकाइ हुने विद्यालयमा निरन्तर अतिरिक्त क्रियाकलाप सहित विद्यार्थीको सिकाइ मुल्यांकन गर्ने उद्देश्य लिइने भएको छ ।
