झापा। झापाको बिर्तामोडस्थित पताल गंगा बचत तथा ऋण सहकारी संस्थामा करोडौं रकम हिनामिना गरेको आरोप लागेकी रेवती खनाललाई प्रहरीले पक्राउ गरेको छ।
प्रहरीका अनुसार खनालले संस्थाका बचतकर्ताहरूको करिब ६ करोड रुपैयाँभन्दा बढी रकम हिनामिना गरेर लामो समयदेखि फरार थिइन्। वित्तीय अनियमितता प्रकरणमा संलग्न भएको आशंकामा अनुसन्धानको घेरामा रहेकी खनाल केही समयदेखि सम्पर्कविहीन थिइन्।
झापा प्रहरीले दिएको जानकारीअनुसार गोप्य सूचनाका आधारमा खनाललाई बिर्तामोडबाटै पक्राउ गरिएको हो। हाल उनीमाथि थप अनुसन्धान भइरहेको छ भने सहकारीका पीडित सदस्यहरूले न्यायको माग गरेका छन् ।
सहकारी संस्थामा व्यापक अनियमितता भएपछि धेरै बचतकर्ताहरूको निक्षेप जोखिममा परेको भन्दै पीडितहरूले सम्बन्धित निकायसँग कडा कदम चाल्न माग गर्दै आएका थिए। घटनापछि सहकारीप्रतिको विश्वासमा गहिरो असर परेको स्थानीयहरूले जनाएका छन्।
